Last Updated on 22/05/2026 by EL
Lideri i së djathtës nacionaliste në Slloveni, Janez Jansa, u zgjodh sot kryeministër nga parlamenti i vendit, falë një marrëveshjeje për koalicion pakice dhe mbështetjes së brishtë të një partie proteste.
Për rikthimin e tij në pushtet votuan 51 deputetë, ndërsa 36 votuan kundër, nga 87 ligjvënës të pranishëm në parlamentin prej 90 vendesh.
Jansa, një admirues i presidentit amerikan Donald Trump dhe figurë e njohur e së djathtës sllovene, rikthehet kështu në krye të qeverisë për mandatin e tij të katërt, pas zgjedhjeve parlamentare të marsit që prodhuan një rezultat shumë të ngushtë dhe javë të tëra negociatash për formimin e qeverisë.
Zgjedhja e Jansës sinjalizon një zhvendosje të politikës sllovene drejt së djathtës, pas katër vitesh qeverisjeje të kampit liberal të drejtuar nga Robert Golob./ET