Dy persona humbën jetën si pasojë e stuhisë “Boelo” që goditi pjesë të Mbretërisë së Bashkuar me erëra të forta, shira të rrëmbyeshëm dhe përmbytje, duke lënë rreth 90 mijë abonentë pa energji elektrike të dielën në mbrëmje, njoftuan sot mediat lokale.
Një burrë 60-vjeçar humbi jetën pasi u godit nga një pemë që u rrëzua pranë Kështjellës Douglas në Dumfries në Skoci ndërsa një burrë në të 20-at humbi jetën kur një pemë u rrëzua mbi makinën e tij në Londrën veriore, raportoi Sky News, duke cituar autoritetet.
Dy gra u shtruan në spital pasi u goditën nga një pemë që u rrëzua, tha raporti. Skocia, pjesë të Irlandës së Veriut dhe Anglia veriore u goditën rëndë nga stuhia, e cila solli erëra deri në 135 kilometra në orë.
Sipas Shoqatës së Rrjeteve të Energjisë, rreth 90 mijë abonentë mbetën pa energji elektrike që nga ora 19:00 sipas kohës lokale të dielën. Disa pjesë të Skocisë regjistruan reshje shiu ekuivalente me rreth një të tretën e totalit mesatar mujor gjatë fundjavës.
Zyra Meteorologjike e Mbretërisë së Bashkuar paralajmëroi për mot të paqëndrueshëm në fillim të kësaj jave, me kushtet që pritet të përmirësohen të hënën përpara se një sistem tjetër moti të sjellë shira të rrëmbyeshëm dhe erëra të forta të martën.
Një paralajmërim i verdhë për motin për erëra të forta u lëshua për pjesë të Anglisë veriore, Skocisë dhe Irlandës verilindore, në fuqi nga ora 3 e mëngjesit të së martës deri në mesnatë.
Paralajmërime për përmbytje dhe ndërprerje të transportit
Shqetësimet për përmbytje vazhduan në të gjithë Mbretërinë e Bashkuar ndërsa autoritetet lëshuan paralajmërime dhe alarme të shumta.
Agjencia e Mjedisit lëshoi 10 paralajmërime për përmbytje dhe 65 alarme për përmbytje në Angli ndërsa Agjencia Skoceze e Mbrojtjes së Mjedisit raportoi 10 paralajmërime dhe 11 alarme.
Burimet Natyrore të Uellsit thanë se nëntë alarme për përmbytje janë në fuqi. Shërbimet e transportit u ndërprenë gjithashtu rëndë, veçanërisht rrjetet hekurudhore në Skoci.
Disa fluturime u devijuan ose u anuluan në aeroportin “Leeds Bradford” ndërsa pemët e rrëzuara, sipërfaqet e dëmtuara të rrugëve dhe kabllot në karrexhata detyruan mbylljen e rrugëve kryesore në Skoci./ad