Last Updated on 03/09/2026 by Anisa
Udhëtarët nga vendet e Bashkimit Europian do të kenë më pak kohë për të eksploruar Tajlandën pa vizë duke nisur nga 15 shtatori, pasi destinacioni i njohur turistik përgjysmon periudhën aktuale të qëndrimit prej 60 ditësh. Mbajtësit e pasaportave të vendeve të Bashkimit Europian do të përballen me një reduktim të ndjeshëm të periudhës së qëndrimit pa vizë në Tajlandë nga mesi i shtatorit.
Vendi i Azisë Juglindore ka njoftuar se do ta përgjysmojë në 30 ditë periudhën gjatë së cilës turistët nga më shumë se 60 vende dhe territore mund të qëndrojnë pa vizë. Kjo masë ishte paralajmëruar që në muajin maj, por tashmë është konfirmuar zyrtarisht se do të hyjë në fuqi më 15 shtator.
Euronews Travel kishte raportuar më herët se vendimi lidhej, me sa duket, me një seri krimesh të profilit të lartë ku ishin përfshirë shtetas të huaj. Raportimet e mediave lokale tregojnë se kohët e fundit janë arrestuar disa të huaj, të akuzuar për vepra që variojnë nga shkeljet e lidhura me drogën dhe trafikimi seksual, deri te ushtrimi i aktiviteteve të biznesit, përfshirë hotele dhe shkolla, pa lejet e nevojshme.
Megjithatë, turizmi mbetet jetik për ekonominë e Tajlandës. Ky sektor përbën më shumë se 10% të Prodhimit të Brendshëm Bruto të vendit dhe Tajlanda vazhdon të jetë një nga destinacionet më të vizituara në Azi. Aktualisht, vizitorët nga më shumë se 90 vende, përfshirë shtetet e zonës Schengen me 29 anëtarë, mund të vizitojnë Tajlandën dhe të qëndrojnë deri në 60 ditë pa vizë.
Por nga mesi i shtatorit, për më shumë se 60 prej këtyre vendeve – mes tyre edhe shtetet e Bashkimit Europian – periudha do të reduktohet në 30 ditë. Departamenti i Çështjeve Konsullore i Ministrisë së Jashtme të Tajlandës ende nuk ka bërë të ditur se çfarë do të ndodhë me udhëtarët nga rreth 20 vende të tjera.
Ndërkohë, për vizitorët nga Peruja, Brazili dhe Koreja e Jugut do të ndodhë e kundërta. Nga mesi i muajit, periudha e qëndrimit pa vizë për ta do të zgjatet në 90 ditë, nga 60 ditë që është aktualisht.
Mundësi për ta zgjatur qëndrimin
Megjithatë, ndryshimi nuk sjell vetëm lajme negative për turistët europianë. Sipas informacioneve të raportuara më herët nga Euronews Travel, vizitorët që hyjnë në Tajlandë pa vizë do të kenë mundësi ta zgjasin një herë qëndrimin e tyre, në varësi të miratimit të një oficeri të emigracionit. Një alternativë tjetër është Destination Thailand Visa (DTV), e cila lejon qëndrime deri në 180 ditë për çdo hyrje në vend. Kjo periudhë mund të zgjatet edhe me 180 ditë të tjera. Megjithatë, kjo vizë shoqërohet me disa kushte. Aplikantët duhet të dëshmojnë se kanë të paktën 500 mijë baht, ose rreth 13 mijë euro, në një llogari bankare. Në rastin e personave që punojnë në distancë, kërkohet gjithashtu dokumentacion që provon se ata janë të punësuar jashtë Tajlandës.
Turizmi ende nën nivelet para pandemisë
Tajlanda ka pritur gati 21 milionë vizitorë të huaj që nga fillimi i vitit 2026. Megjithatë, ky numër është rreth 3% më i ulët krahasuar me të njëjtën periudhë të vitit të kaluar, duke konfirmuar tendencën sipas së cilës numri i turistëve ndërkombëtarë ende nuk është rikthyer në nivelet e regjistruara përpara pandemisë. Ndryshimi i rregullave të hyrjes vjen kështu në një moment delikat për Tajlandën: autoritetet po përpiqen të vendosin kontrolle më të forta ndaj qëndrimeve të të huajve, ndërkohë që turizmi vazhdon të jetë një nga shtyllat kryesore të ekonomisë së vendit./EURONEWS-ad