Kryetari i Grupit Parlamentar të Partisë Socialiste e Shqipërisë, Taulant Balla, ka zhvilluar një takim me Nënkryetaren e Grupit Socialdemokrat në Bundestagun gjerman, Sonja Eichwede, në kuadër të punimeve të Konferencës së Sigurisë në Mynih.
Përmes një postimi në rrjetet sociale, Balla deklaron se deputetja Eichwede, është një zë i rëndësishëm në çështjet e drejtësisë në Parlamentin Federal të Gjermanisë si dhe anëtare aktive në komisionet që lidhen me drejtësinë dhe shtetin e së drejtës, ajo luan një rol kyç në hartimin dhe mbikëqyrjen e legjislacionit që garanton pavarësinë e gjyqësorit, forcimin e institucioneve demokratike dhe sigurinë juridike.
Balla vlerësoi mbështetjen e vazhdueshme të Bundestagut gjerman ndaj Shqipërisë. Takimi u cilësua si një hap i rëndësishëm në thellimin e dialogut politik dhe bashkëpunimit ndërmjet dy vendeve. /Kb