Banorët e Kievit shprehen skeptikë për përparimin e bisedimeve të armëpushimit në Abu Dhabi, ndërsa negociatorët ukrainas dhe rusë nisën raundin e dytë të takimeve të ndërmjetësuara nga Shtetet e Bashkuara, për të avancuar përpjekjet për t’i dhënë fund konfliktit më të madh në Evropë që nga Lufta e Dytë Botërore.
Dariia Ulman, e veja e një ushtari të dekoruar ukrainas që u vra dy vjet më parë, thotë se lufta do të vazhdojë “për shekuj”. “Natyrisht, lufta do të përfundojë përmes negociatave. Por nuk do të ndodhë këtë muaj, apo edhe këtë vit. Njerëzit do të vazhdojnë të vdesin. Duhet gjithmonë të urrejmë Rusinë dhe të mbështesim ushtrinë dhe popullin ukrainas,” tha ajo.
Serhii, një shofer taksie 38-vjeçar, shprehu mosbesim: “Shpresojmë që të ndryshojë diçka, natyrisht. Por nuk besoj se do të ndryshojë ndonjë gjë tani. Ne nuk do të dorëzohemi, dhe as ata nuk do të dorëzohen.”
Olena Sokotiuk, drejtoreshë e një iniciative publike, shtoi: “Sinqerisht, nuk pres asgjë të re. Mendoj se gjithçka do të jetë si në negociatat e mëparshme. Të paktën publikisht, do të duket po e njëjta gjë.”
Ndërsa Viktor Kravchuk, një guidë turistike 66-vjeçar, vlerësoi: “Në çdo rast, askush nuk do të fitojë me armë, sepse do të ishte e pafund. Duhet të ketë negociata dhe të arrihet njëfarë marrëveshjeje.”
Sofii Popovych, një përkthyese 21-vjeçare gjermane, tha: “Nëse po zhvillohen negociata dhe tre vende janë në të njëjtin tryezë, duhet të dalin me një vendim të përbashkët. Shpresoj që vendimi të jetë i dobishëm për vendin tonë — të mos dorëzojmë territoret, njerëzit, gjuhën apo pavarësinë tonë.”
Raundi dy-ditor i takimeve vjen pasi Presidenti Volodymyr Zelenskiy tha se Rusia ka shfrytëzuar armëpushimin e përkohshëm të mbështetur nga SHBA-ja për energjinë, duke grumbulluar municione dhe sulmuar Ukrainën me një numër rekord raketash balistike më 3 shkurt.
Negociatori kryesor ukrainas, Rustem Umerov, njoftoi në Telegram se ekipet do të takohen gjithashtu në grupe të veçanta për të diskutuar tema specifike dhe më pas do të ketë një takim të përbashkët për të koordinuar pozicionet./mxh