Last Updated on 06/10/2026 by Anisa
Kryetari i Bashkisë së Tiranës, Erion Veliaj, ka bërë dy emërime të reja në strukturën drejtuese të institucionit, duke rikthyer Sara Goxhajn në postin e nënkryetares dhe duke emëruar në të njëjtin funksion ish-deputetin socialist dhe ish-prefektin e Tiranës, Sadi Vorpsi.
Por, menjëherë pas marrjes së detyrës, drejtuesit e rinj kanë nisur punën me një fokus të përcaktuar: pastrimin e Tiranës.
Sipas urdhrit të parë të drejtuesve të rinj, puna për pastrimin dhe mirëmbajtjen e kryeqytetit do të vijojë 24 orë, me synim përmirësimin e situatës në terren dhe reagimin e shpejtë ndaj problematikave të evidentuara në zona të ndryshme të Tiranës.
Ky orientim vjen në një moment kur Bashkia e Tiranës ka kaluar një sërë ndryshimesh në strukturën e saj drejtuese. Me dy emërimet e fundit, institucioni ka tashmë katër nënkryetarë: Sara Goxhaj, Sadi Vorpsi, Vasilika Vjero dhe Ilir Mëngra.
Sara Goxhaj rikthehet në një post që e ka mbajtur edhe më herët. Ajo ka qenë pjesë e administratës vendore dhe, pas largimit të Anuela Ristanit nga drejtimi i komanduar, kishte ushtruar edhe kompetencat e kryetares së komanduar të Bashkisë së Tiranës. Më pas, me rikthimin e Ristanit, kompetencat iu tërhoqën.
Ndërkohë, Sadi Vorpsi rikthehet në administratën publike pas disa vitesh larg funksioneve politike. Ai ka shërbyer si prefekt i Qarkut të Tiranës gjatë viteve 2013–2017 dhe më pas u zgjodh deputet i Partisë Socialiste në zgjedhjet parlamentare të vitit 2017. Përpara zgjedhjeve të vitit 2021, Vorpsi deklaroi se nuk do të rikandidonte për një mandat të dytë.
Tashmë, të dy rikthehen në kupolën drejtuese të bashkisë, ndërsa pastrimi i qytetit është vendosur në fokusin e menjëhershëm të punës së tyre, me kërkesën që shërbimet të funksionojnë pa ndërprerje, 24/7.