Last Updated on 15/04/2026 by EL
sh-kryeministri i Kosovës, Ramush Haradinaj kujton sot më 15 prill vrasjen e të vëllait, Enver Haradinaj. Ai kishte qenë luftëtar i Ushtrisë Çlirimtare, ashtu si Ramushi, Dauti dhe dy vëllezërit e tjerë që ranë gjatë luftës, Luani dhe Shkëlzeni.
“Dhimbjet nuk u ndalën as pas luftës. Shumë shqiptarë të zotë u ndanë nga ne, i kujtojmë përjetë. Të kujtojmë përjetë, vëlla Enver”, shkruan ish-kryeministri i Kosovës, Ramush Haradinaj, familja e të cilit ashtu si shumë familje shqiptare, dhanë bijtë e tyre për lirinë e Kosovës.
Por ndryshe nga dy vëllezërit që ranë në luftë, Enveri u vra pas shpine, pabesisht. Dukagjini ziente dhe familja priste reagim, por kur Ramushi u kthye me leje nga Haga, ai bëri një fjalim të fortë në varrimin e Enverit, duke deklaruar se kushdo që e kishte bërë, do të ishte i falur.
Vrasja e Enver Haradinaj, 15 prill 2006
Pesë javë pasi Ramush Haradinaj dha dorëheqjen si kryeministër dhe u transferua në burg në Hagë, vëllai i tij Enver u vra. Në orën 15.00 pasditen e së premtes, datë 15 prill 2005, Enveri po udhëtonte nga shtëpia e prindërve të tij në Gllogjan për në qytetin e Pejës, i shoqëruar nga një mik. Sipas tij, një Audi i kuq 80 kaloi pranë automjetit të Enverit, në afërsi të fshatit Rausic, dhe një nga pasagjerët qëlloi disa herë.
Enveri u plagos për vdekje dhe vdiq pak më vonë atë pasdite. Ai ishte 25 vjeç. Kishte qenë luftëtar i UÇK-së në luftën e 1998-1999, gjatë së cilës ai pësoi një plagë të rëndë në këmbë që i shkaktoi atij një problem të konsiderueshëm në pjesën tjetër të jetës së tij, të shkurtër.
Ramush Haradinajt iu dha lirim i përkohshëm për t’u kthyer në Kosovë për të marrë pjesë në funeralin e Enverit, i cili u zhvillua të dielën e 17 prillit.
Mbështetësit e tij organizuan një avion privat për ta transportuar atë në Kosovë. Ai u prit në aeroport nga e gjithë qeveria, e drejtuar nga Bajram Kosumi që kishte pasuar atë si kryeminister. Përshëndetjet formale nuk zgjatën më shumë se disa sekonda dhe pastaj të gjithë u grumbulluan në një karvan të gjatë policie, ushtarie e makinash private, të cilat nxitonin drejt fshatit Gllogjan.
Më shumë se njëqind mijë njerëz nga mbarë Kosova u mblodhën në Gllogjan në funeralin e Enver Haradinajt. Atë pasdite, rrjeti i tre rrugëve të vogla në trekëndëshin e formuar nga qytetet e Pejës, Klinës dhe Deçanit ishte jashtë funksioni, në pamundësi për të përballuar trafikun e madh.
Dhjetra mijëra njerëz braktisën automjetet e tyre dhe ecën më shumë se 20 kilometra për të qenë të pranishëm në varrim.
Gjendja e zymtë shoqërohej me re të zeza që kërcënonin për shi gjatë gjithë pasdites. Enveri u varros së bashku me dy vëllezërit e tij të cilët gjithashtu kishin vdekur në një mënyrë të dhunshme: Luani në një pritë serbe në maj të vitit 1997 në moshën 24-vjeçare dhe Shkëlzeni, i cili ishte 29 vjeç kur u vra në një përballje me forcat paraushtarake serbe në prill të vitit 1999./et