Festat e fundvitit janë sinonim i tryezave plot ushqime, pijeve të pafundme dhe ëmbëlsirave joshëse, por bashkë me këto kënaqësi vijnë edhe disa kalori shtesë që mund të mos largohen lehtë. Sipas studimeve, shtimi në peshë gjatë kësaj periudhe shpesh mbetet për pjesën tjetër të vitit, duke kontribuar në akumulimin e kilogramëve të tepërt gjatë jetës. Megjithatë, ka mënyra efektive për të shmangur këtë efekt festiv pa hequr dorë nga kënaqësitë e tavolinës.
Çfarë thotë shkenca?
Një studim nga “National Institute of Health” zbuloi se njerëzit shtojnë mesatarisht një kilogram deri në Vitin e Ri dhe ky kilogram shpesh nuk largohet. Po ashtu, një rishikim sistematik i botuar në revistën Nutrients tregoi se ngrënia e tepërt gjatë festave është një praktikë globale, e nxitur nga stresi, devijimi i rutinës dhe mendësia “Do filloj dietën nga janari”.
Këshilla për të ruajtur ekuilibrin:
1. Planifikoni ditën ushqimore: Nëse e dini që do të keni një darkë të bollshme, konsumoni porcione më të vogla gjatë ditës.
2. Përfshini ushqime të shëndetshme: Filloni vaktin me një sallatë ose rrisni porcionet e perimeve në pjatën tuaj.
3. Kujdes me pijet: Kontrolloni sasinë e pijeve të ëmbla apo alkoolit dhe alternojini me ujë ose pije të ulëta në kalori.
4. Kryeni aktivitete fizike: Organizoni aktivitete me të afërmit, si ecje, patinazh ose lojëra që ju mbajnë aktivë.
5. Shmangni nepsin e pavetëdijshëm: Evitoni ngrënien e ushqimeve të larta në kalori gjatë shikimit të televizorit.
6. Rifitoni rutinën e gjumit: Sigurohuni të flini të paktën 7 orë për të shmangur oreksin e shkaktuar nga mungesa e gjumit.
Pesha që shtohet gjatë festave mund të mos largohet lehtë, por me disa hapa të thjeshtë dhe të qëndrueshëm mund të shijoni periudhën festive pa sakrifikuar shëndetin tuaj. Përfshini këto këshilla në përditshmërinë tuaj dhe mbani ekuilibrin midis kënaqësisë dhe kujdesit për veten./K.B
