Botafogo humbi dje ndeshjen e radhës kundër Flamengos dhe ky nuk është shqetësim për Kombëtaren shqiptare, por shqetësim është që pas kësaj humbjeje, klubi i Botafogos po kërkon një trajner të ri për të drejtuar skuadrën në këtë sezon dhe këtu gjithçka lidhet me Sylvinhon, trajnerin e ekipit tonë kombëtar.
Pavarësisht se kontrata e tij është deri ne fund të këtij viti, Silvinjo nuk është “lënë rehat” nga vendi i tij. Sipas “RTI Esporte”, raportohet se Botafogo, pas bisedave me Mancinin dhe Titen, është interesuar edhe për Sylvinhon. Siç bëhet e ditur nga Brazili, presidenti amerikan i klubit John Textor ka folur në një videokonferencë me Sylvinhon ditën e martë në lidhje me një kalim të mundshëm në Brazil.
Megjithatë, edhe pse janë disa kandidatë, Sylvinho ka profilin e dëshiruar nga presidenti i Botafogos: kokëfortë, studioz dhe një menaxher i mirë grupi. Për më tepër, trajneri është i orientuar drejt detajeve, i rreptë në fushë dhe adhurues i futbollit të bukur”, shkruan e njëjta media.
Sylvinho ka refuzuar të përgjigjet deri në këto momente dhe biseda e tij në video me presidentin e Botafogos, (sipas mediave braziliane), mbetet sekret. Nuk dihet nëse trajneri që është në kontratë deri në fund të këtij viti me Kombëtaren shqiptare, i ka mbyllur dyert klubit brazilian apo po merr kohën e duhur për të menduar edhe një largim të mundshëm pa filluar fushata kualifikuese e Botërorit. Të paktën deri tani, Sylvinho nuk ka sqaruar asgjë./ D.C
