Gjykata e Lartë vendosi dje të lerë në qeli ish-presidentin Ilir Meta. Kërkesa e Metës për ndryshim të masës së sigurisë u rrëzua, çka nënkupton se tashmë i ka ezauruar të gjithë shkallët e qyqësorit duke ia shuar çdo shpresë se mund të dilte për të marrë pjesë në fushatën elektorale.
Gjykata e Lartë ka vendosur të lërë në fuqi masën e sigurisë “arrest me burg” për kreun e Partisë së Lirisë, Ilir Meta, duke rrëzuar rekursin e tij dhe duke konfirmuar vendimin e marrë më herët nga Gjykata e Posaçme Kundër Korrupsionit dhe Krimit të Organizuar dhe Apeli i Posaçëm.
Trupi gjykues i përbërë nga gjyqtarët Medi Bici dhe Albana Boksi dhe Ilir Panda shqyrtoi kërkesën e Metës dhe të avokatëve të tij për të rrëzuar masën e arrestit, por në përfundim e la në fuqi vendimin e mëparshëm, duke e detyruar Metën të qëndrojë pas hekurave për një periudhë të pacaktuar.
Ky vendim vjen ndërsa ish-presidenti ndodhet në paraburgim prej 21 tetorit 2024, kur u arrestua me urdhër të SPAK në autostradën Tiranë-Durrës, ndërsa kthehej nga Kosova. Meta po hetohet për korrupsion, pastrim parash dhe fshehje pasurie, së bashku me ish-bashkëshorten e tij, deputeten Monika Kryemadhi, e cila po ashtu është përballur me drejtësinë, por ndaj saj është caktuar masa “detyrim paraqitje”.
Reagimi i Metës
Pas vendimit të Gjykatës së Lartë, Ilir Meta reagoi ashpër duke e cilësuar procesin si një “pengesë fiktive” dhe duke paralajmëruar se do ta çojë çështjen në Gjykatën Evropiane për të Drejtat e Njeriut në Strasburg. “Ta bëjmë Shqipërinë madhështore përgjithmonë, ky është zotimi ynë. 11 maji është një ditë historike. Kaluam edhe një pengesë fiktive në Gjykatën e Lartë, që nuk ekziston, për të ecur sa më shpejt në Strasburg.
Do të fitojmë siç kemi fituar në Komisionin e Venecias kundër Ramaformës,” deklaroi Meta pas vendimit. Meta ka qenë kritik i vazhdueshëm ndaj sistemit të drejtësisë dhe ka akuzuar shumicën qeverisëse për ndikim politik mbi institucionet e drejtësisë. Ai e ka cilësuar arrestimin dhe hetimet ndaj tij si një përpjekje për ta larguar nga skena politike përpara zgjedhjeve të 11 majit. Gjatë procesit në Gjykatën e Lartë, avokatët e Metës argumentuan se ndaj tij nuk ekzistonin kushtet ligjore për të caktuar masën e arrestit me burg.
Ata e cilësuan këtë vendim si të padrejtë dhe të motivuar politikisht, duke pretenduar se nuk kishte prova të mjaftueshme që e rëndojnë Metën në lidhje me akuzat e ngritura nga SPAK. Sipas tyre, nuk ka asnjë rrezik që Meta të prishë provat ose të ndikojë në dëshmitarët, duke e bërë të pajustifikueshme mbajtjen e tij në paraburgim.
Mbrojtja pretendoi gjithashtu se masat ndaj Metës po përdoren si një mënyrë për të penguar aktivitetin e tij politik, veçanërisht në prag të zgjedhjeve parlamentare të 11 majit, ku Partia e Lirisë synon të jetë një faktor kyç. Gjithsesi, Gjykata e Lartë nuk i mori parasysh këto argumente, duke e lënë në fuqi masën e sigurisë dhe duke rrëzuar rekursin e paraqitur nga avokatët e tij.
Me vendimin e djeshëm, Ilir Meta duhet të qëndrojë në burg të paktën deri në përfundimin e hetimeve dhe marrjen e një vendimi gjyqësor përfundimtar. Përveç rrëzimit të rekursit të Metës, Gjykata e Lartë vendosi gjithashtu të mos e pranojë kërkesën e Monika Kryemadhit për heqjen e masës së sigurisë “detyrim paraqitje”. Ish-kryetarja e LSI dhe bashkëshortja e Metës është nën hetim për të njëjtat akuza dhe duhet të paraqitet rregullisht pranë autoriteteve hetimore.
