Rusia ka njohur zyrtarisht qeverinë e Talibanëve në Afganistan, duke u bërë shteti i parë që e bën këtë që nga marrja e pushtetit nga grupi islamist në vitin 2021. Ministria e Jashtme ruse njoftoi të enjten se ka pranuar ambasadorin e ri afgan, Gul Hassan Hassan, i cili dorëzoi kredencialet e tij zyrtare zëvendësministrit të Jashtëm rus, Andrey Rudenko.
Në një deklaratë, ministria theksoi se ky hap pritet të nxisë zhvillimin e bashkëpunimit dypalësh në fusha të ndryshme, përfshirë energjinë, transportin, bujqësinë dhe infrastrukturën. Rusia gjithashtu shprehu gatishmëri për të ndihmuar në forcimin e sigurisë rajonale dhe në luftën kundër terrorizmit dhe trafikut të drogës.
Ministria e Jashtme e Talibanëve e cilësoi vendimin si “pozitiv dhe të rëndësishëm”, duke publikuar foto të ministrit të jashtëm Amir Khan Muttaqi gjatë një takimi me ambasadorin rus në Kabul, Dmitry Zhirnov./e.t
