Ish-deputeti i Partisë Demokratike, Ervin Salianji, në një konferencë për shtyp nga selia blu u pyet nëse do të kandidojë për deputet në zgjedhjet e vitit 2029.
Salianji tha se ka një pengesë që është moszbardhja e vendimit të Gjykatës së Lartë dhe se ka një falsifikim të shortit për përzgjedhjen e trupës gjyqësore që shqyrtoi rekursin.
Salianji u shpreh se do të jetë aktiv dhe në komunikim të herëpashershëm ndërsa shtoi se i është drejtuar SPAK për të zbardhur çështjen dhe përgjegjësit për trupën gjyqësore që u vendos pa short. Sipas tij, trupa gjykuese u caktua nga Fatmir Xhafaj.
“Do kemi komunikime të herëpashershme. Do jem aktiv. Jam përpjekur të jem edhe me komunikime nga burgu. Nuk është e njëjta gjë. S’ka të krahasuar fushata elektorale me letra me shkrim nga burgu. Ka një pengesë, moszbardhja e vendimit të Gjykatës së Lartë.
Po e them nëse nuk është bërë lajm. Gjykata e Lartë ka bërë një falsifikim të shortit për të përzgjedhur trupën gjyqësore që shqyrtoi rekursin tim.
I jam drejtuar SPAK të hetojë për këtë çështje për të gjetur përgjegjësit dhe arsye pse duhej hequr një trupë gjyqësore e caktuar me short elektronik dhe u caktua një trupë tjetër që u caktua me miqësi dhe jo me short, miqësi e Fatmir Xhafajt me kryetarin aktual të Gjykatës së Lartë Sokol Sadushi.
Nuk e fshehin as në publik apo festa. Në këtë kuptim është jo vetëm shkelje, por çdo shkelje e garantuar me kushtetutë. Vendimet e Gjykatës së Lartë duhen zbardhur brenda 60 ditëve. Kanë kaluar mbi 100 ditë. Nuk e bëj këtë betejë për të qenë vetëm deputet.”-tha Salianji. m.p.
