Një iniciativë e veçantë bamirësie po tërheq vëmendjen në Mbretërinë e Bashkuar, perdet e vjetra të një prej ambienteve të pallatit mbretëror janë ricikluar dhe janë shndërruar në çorape festive, të cilat do të shiten për të mbështetur programe edukimi dhe zanatesh tradicionale.
Sipas Fondacionit të Mbretit Charles, materiali i perdeve është përpunuar me dorë nga artizanë të specializuar. Secila çorape ka kërkuar orë të tëra pune, duke kombinuar teknika qepjeje, zbukurimi dhe përpunimi të tekstileve të vjetra.
Ky projekt është pjesë e filozofisë së Charles për ripërdorimin e materialeve historike dhe promovimin e ekonomisë qarkore. Fondacioni i tij synon të qëndrojë i lidhur me traditën, zanatet e vjetra dhe qëndrueshmërinë, duke i kthyer materialet e pallatit në objekte të reja me vlerë.
Çorapet e prodhuara do të nxirren në një ankand bamirësie, dhe të ardhurat do të përdoren për kurset profesionale që Fondacioni organizon për të rinjtë dhe artizanët në zhvillim.
Iniciativa ka marrë komente pozitive dhe konsiderohet një mënyrë krijuese për të kombinuar trashëgiminë mbretërore, punën artizanale dhe bamirësinë./ K.M