A po ndërhyn Amerika për krijimin e një opozite të re pa Berishën? Kjo pyetje po qarkullon gjithnjë e më shpesh në qarqet politike shqiptare, sidomos pas sinjaleve të fundit diplomatike.
Takimi i sotëm i të ngarkuarës me punë të SHBA-së me Agron Shehajn nuk mund të shihet thjesht si një takim rutinë, në një kontekst ku opozita tradicionale vijon të jetë e përçarë dhe e konsumuar nga konfliktet e brendshme.
Fakti që në ditët në vijim priten takime edhe me Adriatik Lapajn dhe Arlind Qorin e forcon idenë se Uashingtoni po eksploron alternativa jashtë boshtit klasik të opozitës së drejtuar nga Sali Berisha. Këta aktorë përfaqësojnë profile të ndryshme politike, por kanë një emërues të përbashkët: distancimin nga e shkuara politike që SHBA e ka konsideruar problematike për stabilitetin dhe demokracinë në Shqipëri.
Në këtë këndvështrim, nuk bëhet fjalë domosdoshmërisht për një “projekt amerikan” të mirëfilltë, por për një përpjekje për të inkurajuar një rinovim të opozitës shqiptare. Mesazhi duket i qartë: një opozitë funksionale, pro-perëndimore dhe e besueshme nuk mund të ndërtohet mbi figura që mbajnë barrën e konflikteve të vjetra dhe të sanksioneve ndërkombëtare.
Megjithatë, mbetet për t’u parë nëse këto takime do të përkthehen në një lëvizje të re politike me peshë reale elektorale, apo do të mbeten thjesht sinjale diplomatike. E sigurt është se Amerika po dërgon mesazhe, ndërsa topi është në fushën e politikës shqiptare: a do të arrijë opozita të rigjejë veten pa hijen e së shkuarës, apo do të vazhdojë të mbetet peng i saj? m.p.