Adhurues të Elvis Presley-t kanë mbërritur të mërkurën në qytetin australian Parkes për të marrë pjesë në festivalin ikonë të Elvis-it, Parkes Elvis Festival, ndërsa temperaturat kanë shënuar rritje.
Qindra fansa, të veshur me kostume të shndritshme, peruka të lakuruara dhe madje një model të “Heartbreak Hotel”, janë përshëndetur nga turma në platformën e stacionit të trenit, duke duartrokitur dhe brohoritur me entuziazëm.
“Kur një fëmijë shkon në Disneyland, kjo është si të vij unë në Disneyland-in tim të të rriturve. Thjesht e dua, dua gjithçka për këtë festival,” tha Leanne Graham, një pjesëmarrëse e festivalit.
Në përputhje me temën e festivalit për vitin 2026, e cila i dedikohet filmit klasik të Elvis-it “Love Me Tender” të vitit 1956, pjesëmarrësit jo vetëm që kanë veshur kostume dhe peruka, por edhe veshje me stil Western. Filmi i shfaq Elvis-in si më i vogli nga katër vëllezër në një dramë Western pas Luftës Civile Amerikane.
Me temperaturat që pritet të rriten edhe gjatë fundjavës, fansat e Elvis-it thanë se do të përpiqen të qëndrojnë të freskët. “Sa më shumë të mundemi, larg diellit, shumë ujë për t’u hidratuar, disa birra. Po, ndoshta do t’i ndryshojmë kostumet disa herë në ditë,” tha Anthony Mrak, një tjetër fans i festivalit.
Ky edicion i festivalit do të përfundojë të dielën, më 11 janar, pas paradës rrugore që do të mbahet të shtunën, më 10 janar./mxh