Përdorimi i ngjyrave në etiketat e produkteve ushqimore po bëhet gjithnjë e më i zakonshëm dhe sipas një studimi të publikuar në Current Psychology, ai ndikon ndjeshëm në zgjedhjet e konsumatorëve. Studiues nga SWPS University, University of Wisconsin dhe University of Massachusetts zbuluan se etiketat me ngjyra janë më efektive se tabelat tradicionale ushqyese, sepse truri reagon më shpejt ndaj sinjaleve vizuale të rrezikut dhe përfitimit.
Sipas World Health Organization, mbipesha dhe obeziteti rrisin ndjeshëm rrezikun për sëmundje kronike. Në SHBA, përqindja e fëmijëve dhe adoleshentëve me mbipeshë është rritur shumë në 30 vitet e fundit, kryesisht për shkak të mungesës së aktivitetit fizik dhe konsumit të ushqimeve me shumë yndyrë dhe sheqer.
Për të ndihmuar konsumatorët të bëjnë zgjedhje më të shëndetshme, në Europë përdoren etiketa me ngjyra që tregojnë nivelet e kalorive, yndyrës, sheqerit dhe kripës. Një sistem i njohur është “traffic light labeling”, ku jeshilja tregon përmbajtje të ulët, ndërsa e kuqja përmbajtje të lartë.
Në studim morën pjesë 79 persona, të cilët vlerësuan produkte ushqimore si supë pule, salcë dhe gjalpë kikiriku, me etiketa me ngjyra ose tekst të zakonshëm. Rezultatet treguan se ngjyrat përpunohen menjëherë nga truri dhe ndihmojnë në marrjen e vendimeve të shpejta, edhe kur konsumatorët janë me nxitim.
Një nga gjetjet kryesore ishte se ngjyra e kuqe ka ndikim më të fortë sesa jeshilja. Ajo i bën njerëzit të ndalojnë dhe të mendojnë përpara se të blejnë një produkt, duke reflektuar faktin se informacionet negative ndikojnë më shumë në sjellje sesa ato pozitive.
Gjithashtu, etiketat me ngjyra i ndihmojnë konsumatorët të kuptojnë më qartë ndryshimin mes produkteve të shëndetshme dhe atyre të dëmshme, ndryshe nga informacioni tradicional që shpesh është i paqartë.
Ky studim sugjeron se përdorimi i ngjyrave mund të jetë një mënyrë e thjeshtë, por shumë efektive për të luftuar obezitetin dhe për të përmirësuar zakonet ushqimore, duke ndikuar pozitivisht në shëndetin e popullsisë./et