Pas katër dekadash në harresë, Litfiba rikthen në dritë këngën “17 Re”, një material i papublikuar më parë që i jep edhe titullin albumit legjendar të vitit 1986. Kënga do të publikohet më 17 prill, si pjesë e festimeve për 40-vjetorin e një prej disqeve më të rëndësishme të rock-ut italian.
Albumi “17 Re” konsiderohet sot një pikë kthese për skenën muzikore italiane, ndonëse në kohën e publikimit u prit ftohtë nga kritika. “Sidoqoftë, ne jemi ende këtu duke folur për të,” kujton Piero Pelù, zëri historik i grupit.
Kënga që mbeti në sirtar për dekada nuk ishte përfshirë në album, pasi në atë kohë u gjykua si e papërshtatshme për frymën e projektit. Sot ajo rikthehet në një formë të ripunuar. “Nuk është një operacion nostalgjie,” thekson Pelù. “Meloditë dhe disa pjesë të tekstit kanë mbetur, por gjithçka tjetër ka ndryshuar – ritmi, struktura dhe mbi të gjitha, shpirti.”
Rikthimi i këngës lidhet drejtpërdrejt me ribashkimin e formacionit historik të grupit – Pelù, Ghigo Renzulli, Antonio Aiazzi dhe Gianni Maroccolo – të cilët do të ngjiten sërish bashkë në skenë për një turne me rreth 20 data, duke nisur nga 27 qershori. Është hera e parë që ata performojnë së bashku që nga viti 2014.
Por “17 Re” nuk është vetëm një rikthim muzikor. Për Pelùn, ajo është një deklaratë e fortë për kohën që jetojmë. “Është një këngë tepër aktuale,” shprehet ai. “Jetojmë në një periudhë të dominuar nga abuzimet e pushtetit, nga një teknokraci vrasëse – mjafton të shohësh figura si Benjamin Netanyahu, Donald Trump, Vladimir Putin apo regjime të tjera. Luftërat po shtohen, tensionet po rriten, dhe ne nuk mund të qëndrojmë në heshtje.”
Ai nënvizon se arti mbetet një nga mjetet e fundit për të marrë qëndrim: “Si artistë, ndoshta nuk kemi shumë pushtet, por kemi zërin tonë dhe guximin për të qenë në anën e viktimave.”
Angazhimi politik i Litfiba-s nuk është i ri. Që në fillimet e tyre, me EP-në “Guerra” në vitin 1982, grupi ka trajtuar tema sociale dhe politike. Në vitin 1999, Pelù ishte ndër protagonistët e këngës simbol kundër luftës, Il mio nome è mai più, së bashku me artistë të tjerë të njohur italianë. “Ishte një këngë që bëri histori,” thotë ai, “por sot është e vështirë të imagjinohet një projekt i tillë me të njëjtin ndikim. Ndoshta sot ka më shumë frikë për të marrë anë.”
Përpjekjet për ta rikthyer “17 Re” janë bërë edhe më parë, por pa rezultat. “Nuk ishim të bindur atëherë,” pranon Pelù. “Ndoshta duhej koha e duhur që kjo këngë të piqej.”
Përpara nisjes së turneut “Quarant’anni di 17 Re”, Litfiba do të ngjitet edhe në skenën e koncertit tradicional të 1 Majit në Romë. “Do të jemi aty dhe do të themi fjalën tonë,” premton këngëtari.
Sa i përket së ardhmes së grupit pas turneut, gjithçka mbetet e hapur. “Ne nuk jetojmë ditë pas dite, por orë pas ore,” thotë me humor Pelù. “Nuk dimë as si do ta përfundojmë këtë rrugëtim.”
Por një gjë është e sigurt: rikthimi i një kënge të shkruar 40 vite më parë, që tingëllon ende aktuale sot, është një dëshmi e fuqisë së muzikës për të kapërcyer kohën – dhe për të sfiduar realitetin.
Burimi: ansa.it/ Përgatiti për botim: L.Veizi