Last Updated on 21/04/2026 by Monika
Një hetim i gjerë i Prokurorisë së Milanos ka zbuluar një rrjet të organizuar që dyshohet se merrej me shfrytëzim prostitucioni dhe pastrim parash, duke përfshirë edhe figura nga bota e sportit.
Sipas një komunikate zyrtare, hetimi i koordinuar nga zëvendësprokurorja Bruna Albertini dhe i realizuar nga Njësia e Policisë Ekonomike dhe Financiare në Milano, ka siguruar prova të konsiderueshme kundër të dyshuarve. Ata akuzohen se vepronin në bashkëpunim me persona të tjerë të organizatës, përfshirë shoqëruese dhe marrëdhënës publikë.
Autoritetet kanë arrestuar katër persona, të cilët konsiderohen drejtuesit e grupit kriminal. Ata përballen me akuza të rënda për bashkëpunim në shfrytëzim prostitucioni dhe pastrim të të ardhurave që burojnë nga veprimtari të paligjshme.
Hetimet kanë zbuluar se aktiviteti i organizatës nuk ishte i një niveli të ulët. Kompania e lidhur me këtë rrjet kishte një xhiro që tejkalonte 1.2 milionë euro, duke ofruar paketa luksoze që përfshinin klube nate, hotele dhe shoqëruese, kryesisht pas ndeshjeve sportive.
Në vendimin e gjykatësit të hetimit paraprak, emrat e klientëve janë mbajtur të fshehtë. Megjithatë, sipas mediave italiane, në listë përfshihen të paktën 50 persona, mes tyre futbollistë dhe sportistë të tjerë.
Një element tjetër shqetësues është përdorimi i oksidit të azotit, i njohur si “droga e balonave”. Kjo substancë shkakton ndjesi euforie dhe, sipas hetimeve, u ofrohej klientëve pasi nuk është lehtësisht e zbulueshme në kontrollet antidoping.
Hetimet vijojnë, ndërsa autoritetet po përpiqen të zbardhin plotësisht përmasat e këtij rrjeti dhe përfshirjen e personave të tjerë të mundshëm./mxh