Last Updated on 14/06/2026 by Monika
Personat që lënë duhanin, por kalojnë te cigaret elektronike, mund të përballen me një rrezik dukshëm më të lartë për zhvillimin e kancerit të mushkërive sesa ata që e ndërpresin plotësisht përdorimin e nikotinës. Këtë e tregon një studim i publikuar në revistën shkencore Nature Medicine.
Sipas kërkimit, ish-duhanpirësit që përdorin cigare elektronike pas lënies së duhanit kanë 56% më shumë rrezik për të vdekur nga kanceri i mushkërive krahasuar me ata që nuk përdorin asnjë produkt të tillë. Studimi analizoi të dhënat e mbi 4.5 milionë duhanpirësve në Korenë e Jugut gjatë viteve 2018-2023. Gjatë periudhës së studimit u regjistruan 35.887 raste të kancerit të mushkërive dhe mbi 12 mijë vdekje të lidhura me këtë sëmundje. Studiuesit zbuluan se rreziku ishte më i lartë tek ata që kishin zëvendësuar cigaret tradicionale me ato elektronike. Ekspertët theksojnë se substancat e pranishme në lëngjet e cigareve elektronike dhe në pajisjet që nxehen gjatë përdorimit janë lidhur më parë me dëmtime të ADN-së, inflamacion të rrugëve të frymëmarrjes, ndryshime qelizore dhe stres oksidativ, faktorë që mund të ndikojnë negativisht në shëndet. Megjithatë, studiuesit sqarojnë se duhanpirja tradicionale mbetet zgjedhja më e dëmshme. Ish-duhanpirësit që përdornin cigare elektronike kishin ende një rrezik më të ulët vdekjeje sesa ata që vazhdonin të pinin duhan.
Përfundimi i studimit është i qartë, mënyra më e sigurt për të mbrojtur mushkëritë dhe shëndetin është lënia e plotë e duhanit dhe e produkteve të nikotinës.