Trajneri i Universidad de Chile, Fernando Gago, ka përjetuar një moment të rëndë shëndetësor pas ndeshjes së zhvilluar kundër O’Higgins, duke pësuar një infarkt menjëherë pas konferencës për shtyp.
Ish-futbollisti, tashmë 40-vjeçar, i njohur për karrierën e tij te Real Madridi dhe kombëtarja e Argjentinës, u pa duke shfaqur shenja të forta dhimbjeje gjatë një prej pyetjeve të gazetarëve. Pas një grimase të dukshme në fytyrë, ai piu një gllënjkë ujë dhe u largua menjëherë nga salla e konferencës.
Sipas raportimeve të mediave në Amerikën e Jugut, Gago u transportua me urgjencë në spital, ku gjatë orëve të para të mëngjesit të së premtes iu nënshtrua një ndërhyrjeje kirurgjikale.
Universidad de Chile ka konfirmuar gjendjen e trajnerit përmes një komunikate zyrtare, duke bërë të ditur se ai po kryen ekzaminime kardiovaskulare dhe nuk do të jetë i pranishëm në seancat stërvitore.
“Ju informojmë se trajneri ynë, Fernando Gago, po i nënshtrohet një sërë ekzaminimesh kardiovaskulare dhe nuk do të drejtojë stërvitjet sot. Fernando Gago ndodhet në gjendje të mirë dhe po shoqërohet nga stafi ynë mjekësor”, thuhet në njoftimin e klubit.
Sipas informacioneve të fundit, gjendja e Gagos është e stabilizuar dhe ai po merr kujdesin e nevojshëm mjekësor./ad