Seksi shpesh përshkruhet si një mënyrë natyrale për të ulur stresin, por një studim i ri pretendon se ndikimi i tij nuk është aq i thjeshtë sa mendohet. Sipas hulumtimit të publikuar në Archives of Sexual Behavior, aktiviteti seksual lidhet me nivele më të ulëta stresi gjatë së njëjtës ditë, por efekti nuk duket se zgjat deri të nesërmen. Madje, në disa raste, mund të ndodhë e kundërta.
Studiuesit analizuan të dhënat e 645 personave, përfshirë 319 çifte të martuara prej vitesh. Për dy javë me radhë, pjesëmarrësit regjistronin çdo mbrëmje nivelin e stresit, nëse kishin kryer marrëdhënie seksuale dhe sa të kënaqur kishin qenë nga përvoja.
Rezultatet treguan se në ditët kur çiftet kishin marrëdhënie seksuale, ata raportuan më pak stres krahasuar me ditët kur nuk kishin. Pra, seksi dukej se shoqërohej me një lehtësim të menjëhershëm të stresit.
Megjithatë, kur studiuesit analizuan të dhënat e ditës pasuese, zbuluan se ky efekt nuk vazhdonte. Me fjalë të tjera, seksi nuk u lidh me nivele më të ulëta tensioni 24 orë më vonë.
Por pjesa më interesante e studimit kishte të bënte me motivin që qëndronte pas marrëdhënies seksuale.
Ekspertët ndanë arsyet në dy kategori kryesore:
Motiv afrimi, kur seksi ndodh për afërsi emocionale, intimitet, kënaqësi reciproke apo lidhje më të fortë me partnerin.
Motiv shmangieje, kur përdoret për të evituar debate, tensione, zhgënjime apo konflikte në marrëdhënie.
Dhe pikërisht këtu u shfaq diferenca më e madhe.
Kur seksi ndodhte për të shmangur një konflikt ose për të qetësuar situata të pakëndshme, pjesëmarrësit raportonin nivele më të larta stresi ditën tjetër. Kjo sugjeron se marrëdhënia seksuale nuk funksionon gjithmonë si “ilaç” kundër ankthit, veçanërisht kur shoqërohet me presion, faj apo detyrim emocional.
Sipas autores së studimit, psikologes Sierra D. Peters, mënyra se si dhe pse ndodh intimiteti mund të jetë po aq e rëndësishme sa vetë akti seksual. Në fund të fundit, nuk është vetëm seksi ai që ndikon te mirëqenia emocionale, por edhe konteksti në të cilin ndodh.
Megjithatë, studiuesit theksojnë se rezultatet duhen interpretuar me kujdes. Studimi u krye vetëm me çifte të martuara rishtazi dhe nuk mund të vërtetojë nëse seksi ul stresin apo nëse njerëzit thjesht kanë më shumë gjasa të bëjnë seks në ditët kur ndihen më pak të stresuar.
Një gjë, megjithatë, duket e qartë: seksi mund të ndihmojë për t’u ndier më mirë në moment, por nuk është domosdoshmërisht zgjidhja afatgjatë për stresin. Dhe kur përdoret si mënyrë për të shmangur problemet në marrëdhënie, mund të sjellë më shumë tension sesa lehtësim./mxh