Last Updated on 14/09/2026 by EL
Pas deklaratave të njëpasnjëshme në studiot televizive të ish-ministrit dhe deputetit të PD-së, Enkelejd Alibeaj, kundër Sali Berishës për vizitën e tij në SHBA, ka ardhur edhe reagimi i parë nga familja e kryedemokratit.
Në një postim në Facebook, Jamarbër Malltezi, dhëndri i Berishës, ka postuar një foto të Alibeajt së bashku me Taulant Ballën dhe e ka thumbuar me një thënie të shkrimtarit Mark Twain.
“Nëse merr një qen nga rruga, e shpëton dhe e ndihmon, ai nuk do të kafshojë. Ky është dallimi kryesor mes qenit dhe njeriut”, është thënia e shkrimtarit të njohur.
Kujtojmë që Alibeaj, gjatë intervistave të tij mediatike, ka deklaruar se Berishës, edhe pse ka udhëtuar për në SHBA, nuk i është hequr statusi “Non Grata” nga Amerika.
Ndërsa përplasjet mes Berishës dhe Alibeajt nisën kur ky i fundit u pozicionua në krah të Lulzim Bashës në vitin 2021. Ndërsa, pas marrjes në kontroll të PD-së, kryedemokrati e përjashtoi ish-ministrin./et