Një studim i ri ka hedhur dritë mbi mekanizmin që mund të qëndrojë pas halucinacioneve dëgjimore te personat me skizofreni.
Sipas studiuesve, problemi mund të lidhet me një mekanizëm të trurit që normalisht ndihmon një person të dallojë zërin e tij të brendshëm nga tingujt që vijnë nga jashtë.
Në studim morën pjesë 142 persona dhe aktiviteti i trurit të tyre u analizua përmes EEG-së. Studiuesit vunë re se te personat që përjetonin halucinacione dëgjimore, mekanizmi i njohur si “corollary discharge” nuk funksiononte në mënyrën e zakonshme.
Normalisht, kur një person mendon ose flet me vete në heshtje, truri parashikon tingullin e krijuar dhe zvogëlon reagimin e zonave të dëgjimit. Kur ky proces çrregullohet, truri mund t’i trajtojë mendimet e brendshme sikur vijnë nga një burim i jashtëm.
Studiuesit shpresojnë se këto gjetje mund të ndihmojnë në zhvillimin e mënyrave të reja për të identifikuar dhe kuptuar më herët çrregullimet psikotike. Megjithatë, studimi nuk do të thotë se është zbuluar një test i vetëm që mund të diagnostikojë skizofreninë./ad