Last Updated on 22/11/2026 by Monika
Ish-presidenti i Shqipërisë, Ilir Meta nga qelia e burgut 313, i është bashkuar diskutimeve për buxhetin e vitit të ardhshëm.
Në një postim në Facebook, Meta ka përmendur mashtrimet e qeverisë për sa i përket, shifrave të përdorura në hartimin e buxhetit, ku është marrë si referencë kursi prej 96 lekësh për një euro, ndërkohë që aktualisht valuta europiane ka zbritur në rreth 89 lekë.
Meta e ka cilësuar si propagandë, të ashtuquajturin ‘buxheti historik’ i cili arrin në 10 miliardë euro, duke theksuar se zhvlerësimi i euros nuk përkthehet domosdoshmërisht në rritje të mirëqenies ekonomike për qytetarët e republikës.
Sipas Metës, pavarësisht shifrave që prezanton qeveria, shumica e shqiptarëve vijojnë të përballen me paga dhe pensione të ulëta dhe një kosto të lartë jetese. Kreu i PL ngre shqetësimin se kush do të mbajë përgjegjësinë morale për mashtimet publike që qeveria ka publikuar.
Reagimi i Metës:
Duke e uruar lekun që po ia ul kokën euros, që ka ndryshuar prefiksin dhe ka zbritur në 89 lekë, është interesante të shohim se me çfarë kursi do të hyjmë në 1 janar 2027, kur nis zbatimi i buxhetit të ri të shtetit. Qeveria i ka bërë “llogaritë” me 96 lekë për 1 euro, ndërkohë që sot euro është 89 lekë. Pra, buxheti nis me një mashtrim në përllogaritje, përpara se të nisë zbatimi. Por mashtrimi i dytë është propaganda me “buxhetin historik” prej 10 miliardë eurosh.
Pse kjo shifër është bërë frontline e propagandës, kur buxheti zbatohet në lekë dhe euro sot vlen shumë më pak se në vitin 2013, kur kursi ishte rreth 140 lekë? Një buxhet që duket historik në euro, por që nuk sjell më shumë para për 95% të shqiptarëve, të cilët përballen me paga dhe pensione të ulëta, shërbime të dobëta dhe kosto të lartë jetese. Kush do të mbajë përgjegjësi për këto dy mashtrime publike? Pavarësisht anulimit të Samitit të NATO-s, pikiata e euros vazhdon, sepse Samiti i Arubës vijon punimet e veta!/Mxh
