Akademiku Artan Fuga ka komentuar deklaratat e kryeministrit Edi Rama gjatë mbledhjes së Grupit Parlamentar të Partisë Socialiste, duke thënë se kreu i qeverisë pranoi publikisht ekzistencën e një hendeku mes qeverisjes dhe opinionit publik.
Fuga u shpreh se vetë mënyra se si Rama e interpretoi situatën përbën një pranim se protestat kanë lindur si pasojë e kësaj përplasjeje.
“Zoti Rama pranon që ka një mospërputhje midis opinionit publik dhe qeverisjes. A e shpjegon me anë të Tokëvilit, a e shpjegon me anë të një autori tjetër modern, a e shpjegon me anë të autorëve shqiptarë, apo ka konstatime të veta, fakti është që zoti Rama pranon në atë mbledhje se midis qeverisjes dhe opinionit ka një të çarë që ka prodhuar revoltat“, tha Artan Fuga.
Sipas akademikut, ky është një pranim i tërthortë se protestat kanë një shkak real dhe nuk mund të shihen si ngjarje të rastësishme.
“Me këtë, në një farë mënyre ai bën një lloj autokritike. Tani thekson që protestat kanë një shkak dhe shkaku është një çarje midis politikës, qeverisjes dhe opinionit publik. Këtu vjen pyetja pse ka ardhur kjo? Çfarë ka ndodhur? Qeverisja nuk njeh opinionin publik. Kjo është gjëja e parë. Nuk ecën në përputhje me opinionin publik“, u shpreh Fuga.
Duke iu referuar krahasimit që kryeministri bëri me mendimtarin francez Alexis de Tocqueville, Fuga tha se konteksti historik i autorit është krejt tjetër dhe se pyetja thelbësore mbetet identifikimi i problemeve që kanë prodhuar pakënaqësinë në Shqipëri.
“Thuhet që zoti Rama pranon, duke iu referuar Tokëvilit, i cili fliste për rendin feudal, për monarkinë absolute dhe revolucionin që u bë. Aty është një kontekst tjetër. Konteksti është që Luigji XVI ndërmori disa reforma brenda rendit të vjetër feudal, sepse kishte padrejtësi. Pyetja ngelet: cilat janë, kush i ka krijuar, pse janë krijuar, cilat janë ato në rrafshin politik, ekonomik, social e kulturor? Pra, cilat janë padrejtësitë dhe abuzimet në Shqipërinë e sotme?“, përfundoi akademiku Artan Fuga./ad