Dy raporterë të Asamblesë Parlamentare të Këshillit të Europës (PACE) do të vizitojnë Tiranën nga 30 marsi deri më 1 prill 2026. Ionuț-Marian Stroe dhe Paweł Jabłoński do të zhvillojnë takime me institucionet më kryesore të shtetit, si pjesë e vizitës faktmbledhëse mbi progresin e vendit.
Qëllimi i vizitës është vlerësimi i zhvillimeve të fundit politike dhe i progresit të Shqipërisë në zbatimin e rekomandimeve të Asamblesë, siç parashikohet nga Rezoluta 2544. Asambleja vendosi mbylljen e procedurës së monitorimit të plotë ndaj Shqipërisë në prill 2024 dhe kaloi në dialogun post-monitorim, një mekanizëm më pak intensiv, i fokusuar në një numër të kufizuar çështjesh të mbetura.
Raporterët pritet të zhvillojnë takime me Kryeministrin Edi Rama, Kryetarin e Kuvendit, Niko Peleshi, Ministrin e Punëve të Jashtme, ministrin e Drejtësisë dhe ministrin e Brendshëm, ministrin e Shtetit për Anti-Korrupsionin dhe Administratën Publike, si dhe Komisionet parlamentare dhe Komitetin ad hoc për Reformën Zgjedhore.
Pjesë e takimeve të tyre do të jenë edhe autoritetet gjyqësore, Avokati i Popullit, përfaqësues të shoqërisë civile dhe medias.