Reagimet brenda BE-së kërcënojnë të dobësojnë paketën e re të sanksioneve kundër Rusisë, pasi shtetet anëtare shprehin rezerva në lidhje me shënjestrimin e porteve të huaja, bankave dhe vendeve të treta që dyshohet se lehtësojnë anashkalimin e kufizimeve mbi naftën ruse dhe furnizimin me teknologji me përdorim të dyfishtë.
Sipas burimeve të cituara nga ‘Bloomberg’, disa kryeqytete duken të kujdesshme ndaj propozimit në lidhje me portet në Gjeorgji dhe Indonezi.
Italia dhe Hungaria kanë shprehur shqetësime specifike në lidhje me portin e Kulevi në Gjeorgji, ndërsa Greqia dhe Malta kanë rezerva në lidhje me një port në Indonezi.
Në të njëjtën kohë, Italia dhe Spanja nuk pajtohen me vendosjen e sanksioneve ndaj një banke në Kubë, sipas burimeve të cituara nga Bloomberg.
Skepticizmi po rritet, ndërsa Greqia dhe Malta shprehin gjithashtu shqetësime në lidhje me një propozim që do të hiqte kufirin aktual të çmimit të naftës ruse dhe do ta zëvendësonte atë me një ndalim të plotë për kompanitë evropiane nga ofrimi i shërbimeve të transportit detar, të tilla si transporti dhe sigurimi, për ngarkesat ruse.
Zbatimi i këtij propozimi varet nga mbështetja e vendeve të G7, me Shtetet e Bashkuara që deri më tani nuk kanë marrë një qëndrim të qartë.
Reagimi në rritje mund ta dobësojë ndjeshëm paketën e re të sanksioneve të BE-së, të cilën Komisioni Evropian e paraqiti më parë këtë muaj dhe që synon të ulë të ardhurat ruse nga nafta, si pjesë e një përpjekjeje për të ushtruar presion mbi Moskën që t’i japë fund luftës në Ukrainë.
Ambasadorët e BE-së diskutuan masat të hënën, me bllokun që synon të miratojë paketën brenda muajit. Sanksionet kërkojnë mbështetje unanime nga të gjitha shtetet anëtare përpara se të miratohen.
Ngurrimi i Italisë për të vendosur sanksione në portin e Kulevit lidhet me faktin se gazi natyror nga Azerbajxhani, një burim kyç energjie për Evropën, importohet gjithashtu prej andej, sipas disa burimeve.
Sa i përket Bankës në Kubë, ajo është institucioni i vetëm në ishull që merret me transaksione në valutë të huaj, duke u shërbyer diplomatëve dhe qytetarëve të BE-së që mund të kenë nevojë për mbështetje. Sanksionet e tjera të propozuara ndaj bankave të huaja nuk kanë hasur në rezistencë.
Italia nuk pranoi të komentojë mbi diskutimet për sanksionet. Një zëdhënës i qeverisë greke nuk pranoi të komentojë mbi ndalimin e propozuar të shërbimeve të transportit detar dhe nuk iu përgjigj menjëherë një kërkese të re për koment, raportoi Bloomberg.
Një zëdhënës maltez në Bruksel tha javën e kaluar se vendi po merrte pjesë në konsultime teknike për të siguruar që rezultati përfundimtar do të ishte i zbatueshëm.
Hungaria ka kundërshtuar prej kohësh masat që, sipas saj, kufizojnë furnizimin e saj me energji.
Në një front tjetër, Komisioni Evropian po promovon një ndalim të eksporteve të makinerive dhe pajisjeve të caktuara radiofonike në Kirgistan, duke vlerësuar se këto produkte mund të kontribuojnë në përpjekjet luftarake të Rusisë.
Eksportet e BE-së në vendin e Azisë Qendrore të teknologjive të sanksionuara që mund të përdoren për të prodhuar armë janë rritur tetëfish që nga fillimi i pushtimit të plotë rus në vitin 2022. Në të njëjtën kohë, dërgesat e të njëjtave produkte nga Kirgistani në Rusi janë rritur me 1,000%.
Autoritetet kirgize kanë bërë pak për të ndaluar këtë fluks.
Megjithatë, Zëvendëskryetari i Parë i Këshillit të Ministrave të Kirgistanit, Daniyar Amangeldiyev, i tha Bloomberg gjatë fundjavës se propozimi i BE-së e shënjestron padrejtësisht vendin e tij, duke argumentuar se rritja e tregtisë është për shkak të faktit se niveli fillestar ishte pothuajse zero.
Amangeldiev tha se vendi i tij ishte gati të ndërhynte nëse BE-ja do të ofronte prova për parregullsi. “Këto janë veprime të kompanive private, të individëve të caktuar, dhe ne po përpiqemi t’i ndalojmë ato”, tha ai në margjinat e Konferencës së Sigurisë në Mynih. “Kjo nuk është një politikë e vetme dhe e qëllimshme e Autoriteteve Shtetërore. Nëse marrim prova për shkelje, kompanitë do të ndëshkohen dhe kufizohen.”
Siç tha ai, zyrtarët e Komisionit Evropian pritet të takohen me Qeverinë e Kirgistanit më vonë këtë muaj.
Paketa e re e sanksioneve të BE-së përfshin gjithashtu propozime për të vendosur masa ndaj disa kompanive në Kinë dhe gjetkë që dyshohet se po furnizojnë me energji makinën ruse të luftës. Ajo gjithashtu përfshin shtimin e më shumë anijeve nga e ashtuquajtura “flotë në hije” në listën e zezë, vendosjen e kufizimeve të reja tregtare dhe shënjestrimin e ofruesve të kriptomonedhave dhe bankave të huaja që BE thotë se po ndihmojnë Moskën të anashkalojë sanksionet.
Në Mynih, Presidenti ukrainas Volodymyr Zelensky i bëri thirrje BE-së dhe aleatëve të saj që të vazhdojnë të vendosin sanksione të ashpra kundër Rusisë në mënyrë që ta detyrojnë Vladimir Putinin të shqyrtojë seriozisht mundësinë e negociatave për paqe./mxh