Lamine Yamal ka rrëfyer prapaskenat e finales së Botërorit 2026, ku Spanja mposhti Argjentinën për t’u shpallur kampione e botës.
Sulmuesi i Barcelonës zbuloi se spanjollët ishin të bindur se Argjentina nuk do të arrinte të shënonte pas përjashtimit të Enzo Fernandezit.
“E dinim se ishte e pamundur që ata të shënonin dhe, me topin në këmbët tona ndaj një skuadre me 10 lojtarë, ishte shumë e vështirë që ne të mos shënonim”.
Yamal foli edhe për mënyrën se si tenton t’i çorientojë mbrojtësit kundërshtarë, duke treguar se si e përdori këtë strategji edhe në aksionin që parapriu golin e Ferran Torresit.
“Një mbrojtës i krahut do të ketë një trajner që i thotë: ‘Në rregull, Lamine, ai bën këtë…’. Unë e mendoj atë si një robot që përpiqet të më ndalojë”.
“Robotët mund të jenë pothuajse perfektë, por një njeri ka diçka që roboti nuk e ka. Futbolli është mekanizuar, por ka lojtarë si unë, Pedri dhe shumë të tjerë që kanë atë shkëndijën e veçantë”.
Yamal zbuloi se është frymëzuar edhe nga Neymar dhe lëvizjet e tij karakteristike.
“Është një lëvizje tipike e Neymarit kur ndalet, bën sikur do të shkojë në një drejtim dhe pastaj shkon në tjetrin. Kam parë shumë video të tij. Përpiqem të luaj me kundërshtarët, që ata të mos mund të më mekanizojnë dhe të mos e dinë se ku do të shkoj”.
Në finale, Yamal kujtoi tre aksione brenda disa minutave, ku përballë tij ishte mbrojtësi i Argjentinës, ndërsa Alexis Mac Allister i afrohej vazhdimisht për ta ndihmuar.
“Më kujtohen tri aksione në minutat 60, 70 dhe 80, përafërsisht, kur e provova mbrojtësin e krahut. Çdo herë, Mac Allister vinte për ta ndihmuar”.
“Po të doja vërtet të shkoja kundër mbrojtësit, do të kisha shpejtuar. Por këtë herë shkova më ngadalë, duke e mbajtur topin, në mënyrë që Mac Allister të kishte kohë të vinte, Pedro Porro të arrinte pas meje dhe unë ta ktheja topin”.
Nga ai aksion erdhi edhe goli vendimtar i Ferran Torresit.
“E dinim se Ferrani kishte nevojë për të. Në fakt, të gjithë kanë nevojë për një gol në një finale të Botërorit. Edhe nëse Unai Simon do të kishte shënuar, do të ishte mirë”.
“Kur topi futet në rrjetë, është spektakolare. E ndien se je kampion bote. Nuk mund ta shpjegosh atë emocion”.
Yamal shtoi se gjatë fundit të ndeshjes nuk kishte menduar aspak se Argjentina mund të barazonte.
“Gjithçka që doja ishte të vazhdoja të luaja. Nuk mendova kurrë: ‘Mund të barazojnë’. Kishte një shtytje të vogël, një rast që Pau Cubarsi e largoi, por unë po e shijoja ndeshjen”./et