Last Updated on 12/10/2026 by EL
Fenomeni i motit El Niño, intensiteti i të cilit u vlerësua si “i jashtëzakonshëm”, çoi në ngrohjen e pjesëve të Oqeanit Paqësor në shtator në nivele të paregjistruara më parë, duke rritur temperaturën e oqeaneve të botës në vlera rekord për muajin, njoftoi të hënën shërbimi evropian i monitorimit të klimës Copernicus.
Temperatura e detit, duke përjashtuar rajonet polare, arriti në 21.05 gradë Celsius në nivel global në shtator, që është vlera më e lartë e regjistruar ndonjëherë për atë muaj. Kjo tejkaloi rekordin e mëparshëm mujor nga shtatori 2023, kur temperatura ishte 20.92 gradë Celsius.
Temperaturat e sipërfaqes së detit “mbetën jashtëzakonisht të larta në pjesën më të madhe të Oqeanit Paqësor tropikal, ku kushtet e lidhura me El Niño po forcohen dhe pritet të intensifikohen më tej në muajt në vijim “, sipas buletinit mujor të Copernicus.
El Niño është një ndryshim natyror i klimës që çon në një rritje të temperaturave të sipërfaqes së detit në pjesën qendrore dhe lindore të Oqeanit Paqësor ekuatorial. “Episodi aktual”, i deklaruar në qershor, mund të bëhet më intensivi i regjistruar ndonjëherë, duke intensifikuar më tej efektet e ndryshimeve klimatike të shkaktuara nga njeriu.
Temperatura e sipërfaqes së detit në zonën referuese të Oqeanit Paqësor, e njohur si “rajoni Nino 3.4”, arriti një rekord absolut prej 29.70 gradë Celsius në shtator. Kjo vlerë tejkalon temperaturat maksimale të regjistruara gjatë episodeve të mëparshme shumë të forta të El Niño në vitet 1982/1983, 1997/1998 dhe 2015/2016, gjë që, sipas ekspertëve, tregon “intensitetin e jashtëzakonshëm” të fenomenit aktual.
Agjencia Meteorologjike e Japonisë (JMA) njoftoi të premten se El Niño ishte forcuar më tej dhe se temperatura e detit në zonën referuese të Paqësorit ishte katër gradë Celsius më e lartë se normale. Kjo anomali “tejkaloi rekordin e mëparshëm prej plus 3.6 gradësh, të regjistruar në dhjetor 1997”, tha JMA.
Megjithatë, Koperniku paralajmëroi për France Press (AFP) se ende nuk mund të pretendohet se episodi aktual i El Niño është më i forti i regjistruar ndonjëherë./et