Last Updated on 16/09/2026 by Monika
Novo, kompania farmaceutike daneze e njohur më parë si Novo Nordisk dhe prodhuesja e Ozempic, ka lidhur një partneritet me kompaninë e inteligjencës artificiale Anthropic për të përshpejtuar kërkimin dhe zhvillimin e barnave të reja.
Në kuadër të marrëveshjes, Novo do të përdorë modelet e AI të Anthropic dhe Claude Science për të avancuar analizën dhe arsyetimin shkencor në aktivitetet e kërkimit dhe zhvillimit.
“Bashkimi me Anthropic do t’i japë një shtysë të madhe organizatës sonë të kërkimit dhe zhvillimit dhe do të na ndihmojë në misionin për të sjellë zgjidhje të reja dhe transformuese për shëndetin e njerëzve që jetojnë me sëmundje kronike”, tha Mike Doustdar, president dhe CEO i Novo.
Kompania synon që përmes inteligjencës artificiale jo vetëm të rrisë produktivitetin e ekipeve të kërkimit, por edhe të krijojë mundësi të reja për kërkimin shkencor, veçanërisht në kuptimin e biologjisë njerëzore dhe mënyrës se si funksionojnë barnat.
“Rritja e aftësive të AI-së sjell potencialin për të përmbledhur në një dekadë përparime biologjike dhe mjekësore që do të kërkonin një shekull”, tha Dario Amodei, bashkëthemelues dhe CEO i Anthropic.
Sipas tij, duke u dhënë studiuesve kryesorë akses në modele të avancuara, të sigurta dhe të besueshme të inteligjencës artificiale, mund të shkurtohen afatet e kërkimit, të përmirësohen rezultatet dhe të zbulohen barna e trajtime të reja.
Novo po investon gjithnjë e më shumë në AI
Partneriteti me Anthropic është pjesë e strategjisë së Novo për përdorimin e inteligjencës artificiale në kërkimin farmaceutik.
Kompania përdor gjithashtu OpenAI Science GPT-Rosalind, pas një marrëveshjeje të lidhur në prill, për analizimin e të dhënave komplekse, identifikimin e barnave potenciale dhe shkurtimin e kohës nga kërkimi shkencor deri te pacientët.
Në vitin 2024, Novo Nordisk Foundation u bashkua me Nvidia dhe Fondin Danez për Eksportet dhe Investimet (EIFO) për krijimin e Danish Centre for AI Innovation, që operon Gefion, superkompjuterin e parë të Danimarkës të projektuar për përdorime të avancuara të inteligjencës artificiale.
Edhe Anthropic po zgjeron aktivitetin e saj në sektorin e shkencave të jetës. Në maj 2026, kompania njoftoi një bashkëpunim me Bristol Myers Squibb për përdorimin e Claude në kërkim, zhvillim klinik, prodhim, aktivitetet tregtare dhe funksionet korporative.
Marrëveshja e re tregon se kompanitë e mëdha farmaceutike po përshpejtojnë integrimin e inteligjencës artificiale në kërkim dhe zhvillim, me synimin për të identifikuar më shpejt molekula të reja dhe për të reduktuar kohën që nevojitet për zhvillimin e barnave./mxh