Të dhënat nga Shërbimi i Ndryshimeve Klimatike Koperniku i Bashkimit Evropian, kanë treguar se temperatura mesatare globale e ajrit muajin e kaluar ishte 16.96° Celsius (62.53° F), mesatarja më e lartë mujore globale e regjistruar ndonjëherë.
“Njerëzit nuk kanë parë temperatura aq të larta sa sot, ndoshta të paktën për 100,000 vitet e fundit”, u shpreh Samantha Burgess nga Qendra Evropiane për Parashikime të Motit me Afat Mesëm, e cila mbikëqyr Kopernikun.
Të dhënat e Copernicus, të cilat datojnë që nga viti 1940, regjistruan nivelin më të lartë mujor të të gjitha kohërave vetëm tre vjet më parë, në korrik 2023.
Evropa Perëndimore regjistroi verën e saj më të nxehtë të regjistruar ndonjëherë këtë vit, pas valëve të njëpasnjëshme të të nxehtit, thatësirave dhe zjarreve. Midis mesit të korrikut dhe mesit të gushtit, në Evropë u regjistruan më shumë se 32,000 vdekje të tepërta që lidhen me nxehtësinë, sipas vlerësimeve nga platforma e monitorimit EuroMomo.
Për më tepër, temperaturat e oqeaneve barazuan gjithashtu nivelet e tyre rekord, gjë që zgjati një seri tremujore të nxehtësisë rekord në të gjithë oqeanet e botës. Këto temperatura të ngrohta të oqeanit vijnë me kosto të rëndë për jetën detare, shkëmbinjtë nënujorë dhe komunitetet bregdetare.
Përveç kësaj, ajo që vlerësohet të jetë El Nino më i fortë në epokën moderne, pritet të sjellë ujëra të Paqësorit jashtëzakonisht të ngrohta, duke rritur shanset për mot ekstrem në të gjithë botën, nga përmbytjet te thatësirat dhe zjarret. Shkencëtarët ia atribuan kryesisht nxehtësisë ekstreme ndryshimeve klimatike të shkaktuara nga njeriu .
“Provat janë të pakundërshtueshme: ky është çmimi në rritje i varësisë së njerëzimit nga lëndët djegëse fosile dhe krizës globale klimatike që ajo po nxit”, tha shefi i klimës i Kombeve të Bashkuara, Simon Stiell, në përgjigje të raportit të Kopernikut.
Stiell tha se derisa njerëzimi të ndalojë së djeguri qymyrin, naftën dhe gazin, nxehtësia ekstreme do të vazhdojë të thyejë rekorde.
Ngrohja afatgjatë aktualisht është mesatarisht rreth 1.4°C më e lartë se nivelet para-industriale, pak nën limitin prej 1.5°C të parashikuar sipas Marrëveshjes së Parisit. Javën e kaluar, OKB-ja tha se objektivi prej 1.5°C nuk ishte më i arritshëm dhe kërkoi ulje më të shpejtë të emetimeve të gazrave serrë. /k.m