Last Updated on 23/06/2026 by Kesjana
Evropa po përballet me një paradoks të thellë të strehimit. Ndërsa mungesa e banesave të përballueshme po prek gjithnjë e më shumë familje, miliona njerëz jetojnë në shtëpi me dhoma të papërdorura.
Sipas të dhënave të Eurostatit, një në tre banorë të Bashkimit Evropian jeton në një banesë që konsiderohet e nën-shfrytëzuar, pra me më shumë dhoma gjumi sesa nevojiten për numrin e personave që banojnë në të. Ky fenomen lidhet shpesh me familjet ku fëmijët janë larguar nga shtëpia, ndërsa prindërit vazhdojnë të jetojnë në banesat familjare.
Mesatarisht, 33,4% e qytetarëve të BE-së jetojnë në banesa me hapësirë të tepërt, por diferencat mes vendeve janë të mëdha. Qiproja kryeson renditjen me 69,4%, e ndjekur nga Spanja me 54,3%. Në anën tjetër, Rumania ka nivelin më të ulët me vetëm 8,1%, ndërsa Serbia, Turqia, Letonia, Greqia dhe Kroacia gjithashtu regjistrojnë përqindje të ulëta.
Katër ekonomitë më të mëdha të BE-së paraqesin një panoramë të ndryshme. Spanja ka një nga normat më të larta të nën-shfrytëzimit, Franca arrin në 40,4%, Gjermania është pranë mesatares evropiane me 33,3%, ndërsa Italia qëndron shumë më poshtë me 18,2%.
Ekspertët theksojnë se fenomeni lidhet ngushtë me pronësinë e banesave. Sipas Eurostatit, vetëm 14,2% e qiramarrësve jetojnë në banesa të nën-shfrytëzuara, krahasuar me 40,5% të pronarëve të shtëpive.
Organizatat që merren me çështjet e strehimit argumentojnë se zgjidhja nuk është penalizimi i njerëzve që jetojnë në banesa më të mëdha. Sipas tyre, sfida kryesore mbetet mungesa e banesave të vogla dhe të përballueshme, si dhe nevoja për të rikthyer në përdorim banesat e zbrazëta për strehim social.
Studimet tregojnë se shumica e dhomave të papërdorura gjenden në familje me një ose dy persona dhe në familje pa fëmijë. Gjithashtu, familjet me të ardhura më të larta kanë më shumë gjasa të jetojnë në banesa me hapësirë të tepërt.
Megjithatë, perceptimi i qytetarëve shpesh ndryshon nga statistikat. Studiuesit kanë zbuluar se vetëm dy në pesë persona e konsiderojnë shtëpinë e tyre shumë të madhe, edhe kur ajo klasifikohet si e nën-shfrytëzuar sipas kritereve zyrtare./kb