Last Updated on 16/09/2025 by adminfjala
Aktori kryesor në filmin më të fundit të Paul Thomas Anderson
nga Lucia Magi – ANSA
Leonardo DiCaprio di si të thotë “jo”.
Ai i zgjedh rolet pa nxitim dhe, siç kujton, tridhjetë vjet më parë refuzoi rolin kryesor në filmin “Boogie Nights”. “Kjo është arsyeja pse, kur Paul Thomas Anderson u rikthye me këtë hero të mangët, por komik dhe shumë njerëzor, përgjigjja ime ishte e menjëhershme: ‘po’”, tha aktori në një konferencë për shtyp.
Në hotelin Aster në Hollywood, përballë kritikëve, ai dhe kolegët e kastit prezantuan filmin “The Battle of the Winds”, prodhimin më të fundit të regjisorit të filmave “Magnolia”, “There Will Be Blood” dhe “Licorice Pizza”. Filmi, me një kohëzgjatje prej 162 minutash, vjen në kinema më 25 shtator nga Warner Bros.
I frymëzuar nga romani Vineland i Thomas Pynchon, i vendosur në vitin 1984 – menjëherë pas rizgjedhjes së presidentit republikan Ronald Reagan – filmi është një përzierje mes aksionit, emocioneve dhe argëtimit të pastër. Anderson sjell një tablo të ashpër të Amerikës së epokës Trump, duke ndjekur jetën e trazuar të Bob Ferguson (DiCaprio), një ish-militant i grupit pro-emigrant që kishte vendosur bomba në kufirin SHBA–Meksikë.
Pasi braktis revolucionin, Bobi detyrohet të jetojë i fshehur me vajzën e tij (Chase Infiniti). Jetesa e shkujdesur mes kanabisit, divanit dhe rrobave të vjetra merr fund kur kundërshtari i tij i dikurshëm, një kolonel supremacist i bardhë (Sean Penn), gjurmon vajzën dhe e rrëmben atë. Bobi nis një mision shpëtimi me ndihmën e një grupi shokësh të vjetër – ku spikat Regina Hall dhe një Benicio Del Toro fenomenal, mjeshtër karateje i rrënuar nga jeta dhe birra, që fsheh emigrantë hispanikë në apartamentin e tij.
“Më tërhoqi ideja e një burri që fillimisht duket i destinuar të jetë heroi i pastër”, shpjegon DiCaprio. “Në fillim ai është gati të heqë dorë nga lufta e armatosur për t’u kujdesur për vajzën, por presim që një njeri si ai të ngrihet përsëri, të përdorë mjetet e së kaluarës së tij revolucionare për t’u bërë shpëtimtari përfundimtar.”
Sidoqoftë, filmi merr një kthesë të papritur. Bob Ferguson është një militant që ndërton bomba, shpëton emigrantë nga qendrat e paraburgimit, bërtet në spanjisht dhe përjeton një romancë pasionante me shoqen e tij (Teyana Taylor). Megjithatë, jeta e izoluar me një vajzë adoleshente që nuk di më të lexojë e ka shndërruar në një sharlatan të dashur, paksa paranojak.
“Më pëlqeu përmbysja e pritjeve: e mendon si spiun me aftësi të jashtëzakonshme, por pas 16 vitesh i fshehur nuk kujton dot as fjalëkalimin e vet. Ky detaj krijon një dinamikë heroike krejtësisht të gabuar, që më duk u joshëse”, shton ai. Për këtë rol, DiCaprio la flokët e pakrehur, mjekrën e gjatë, veshi këpucë të rehatshme dhe një këmishë flanele. “Do të gënjeja po të thosha se nuk ishte çliruese”, pranon ai, duke përmendur si frymëzim Dude-in e Jeff Bridges në The Big Lebowski dhe Al Pacinon në Dog Day Afternoon: “Për atë fanatizëm që të shtyn të kthehesh për të mbrojtur ata që do.”
Edhe pse filmi prek tema të forta politike – militarizimin e pushtetit, dhunën dhe kontrollin brutal të imigracionit – aktori zgjedh të fokusohet tek humanizmi i personazhit. “Vetëm pasi e pashë të gjithë filmin, kuptova ku qëndron heroizmi i tij i vërtetë: në aktin e thjeshtë të ecjes përpara, të mosdorëzimit.”
Përgatiti për botim: L.Veizi