Last Updated on 23/02/2026 by Anisa
Kush ishte El Mencho, baroni më i fuqishëm i drogës në Meksikë, i cili u vra disa orë më parë gjatë një operacioni ushtarak?
Nemesio Oseguera Cervantes, i njohur si “El Mencho”, udhëheqësi i Kartelit të Gjeneratës së Re të Jalisco-s (CJNG), u vra sot gjatë një operacioni ushtarak në Meksikë. Një nga njerëzit më të kërkuar në botë, 59-vjeçari ishte shpallur nga autoritetet amerikane si një nga trafikantët më të rrezikshëm, me një shpërblim prej 10 milionë dollarësh për kapjen e tij.
Kush ishte El Mencho?
Nemesio Oseguera Cervantes, i njohur me nofkën “El Mencho”, ishte një nga kriminelët më të kërkuar në botë dhe lideri i Kartelit të Gjeneratës së Re të Jalisco-s (CJNG). Ai u vra më 22 shkurt 2026 gjatë një operacioni ushtarak në Meksikë, sipas raportimeve të Insightcrime.
59-vjeçari transformoi CJNG, nga një grup kriminal i sapoformuar, në një nga organizatat më të frikshme të Meksikës moderne. Ai vepronte si një “shtet paralel” në zonat që kontrollonte, vendoste taksa, menaxhonte punë publike, shfrytëzonte imigracionin dhe drejtonte qendra thirrjesh për mashtrime, duke treguar sesi një kartel droge mund të shndërrohet në një aparat shtetëror.
Autoritetet amerikane kishin ofruar një shpërblim prej 10 milionë dollarësh për kapjen e tij.
Historia e El Menchos
El Mencho lindi dhe u rrit në Michoacan, një shtet perëndimor i Meksikës, në familje të varfër rurale. Në vitet 1980, ai emigroi ilegalisht në Shtetet e Bashkuara, ku ra në kontakt me krimin duke kultivuar fusha me marijuanë.
Pas disa arrestimeve në SHBA dhe një periudhe të gjatë burgimi, ai u deportua në Meksikë në moshën 30 vjeç. Atje, u angazhua plotësisht në krimin e organizuar, duke punuar fillimisht për kartelin Milenio në Michoacan dhe duke fituar reputacion si një shef llogaritës dhe i pamëshirshëm.
Kur karteli Milenio u shpërbë, El Mencho themeloi CJNG dhe e transformoi atë në një strukturë të fuqishme kriminale me krah të armatosur dhe mijëra anëtarë (vlerësuar midis 18,000 dhe 31,000), duke kontrolluar zona të mëdha të Meksikës dhe duke fituar një pjesë të tregtisë së fentanilit pas rënies së Kartelit Sinaloa dhe ekstradimit të Joaquín “El Chapo” Guzmán.
Dominimi pas rënies së rivalëve
Pas rënies së El Chapo-s, karteli i El Mencho-s fitoi terren, duke shfrytëzuar vakumin e krijuar nga fraksionet rivale. Ai u bë një nga figurat kryesore të drogës në Meksikë, duke fituar ndikim të madh në tregun e fentanilit dhe duke përdorur taktika dhune të ngjashme me ato të Pablo Escobar-it, përfshirë vrasjet dhe shkatërrimin e infrastrukturës.
Karteli kishte kapacitet ushtarak të mprehur, duke përfshirë sulme ndaj forcave të armatosura, madje edhe ndaj helikopterëve amerikanë.
Incidentet e dhunshme pas vrasjes
Vrasja e El Mencho-s shkaktoi shpërthimin e dhunës në të paktën tetë shtete meksikane: automjete u dogjën, rrugë u bllokuan dhe oficerë policie u qëlluan.
Në Jalisco, katër anëtarë të CJNG u vranë dhe tre ushtarë u plagosën gjatë operacionit në Tapalpa. Qeveria shpalli kodin e kuq dhe ndaloi transportin publik. Në qytetin e Guadalajarës dhe zonat turistike si Puerto Vallarta, qytetarët përshkruan situatën si “zonë lufte”, me postblloqe dhe dhunë të gjerë.
Nga incidentet u arrestuan 25 persona, 11 për dhunë dhe 14 për grabitje, ndërsa dyqane dhe degë bankash u sulmuan dhe u dogjën.
Reagimet ndërkombëtare dhe lidhja me SHBA
Vrasja e El Mencho-s është një goditje e rëndësishme për kartelet, krahas kapjes së El Chapo-s një dekadë më parë. Administrata e presidentes Claudia Sheinbaum e konsideron këtë një fitore, ndërsa Shtetet e Bashkuara, përmes mbështetjes së inteligjencës, kontribuan në operacion.
Presidenti Donald Trump postoi në platformën e tij sociale, Truth Social, duke e përshkruar këtë ngjarje si “fitore të madhe”. Vrasja mund t’i japë qeverisë një avantazh në marrëdhëniet e saj me administratën Trump, e cila po kërcënon me tarifa ose veprime të njëanshme ushtarake nëse Meksika nuk arrin të tregojë rezultate në luftën kundër karteleve. Mike Vaigi, ish-kreu i operacioneve ndërkombëtare për Administratën Kundër Drogës, tha se Meksika i dërgoi “një mesazh të fortë administratës Donald Trump se po lufton në mënyrë agresive dhe efektive” kartelet më të fuqishme. Ai shtoi se “shumica e informacionit erdhi nga forcat e armatosura meksikane dhe e gjithë merita i takon Meksikës”.
Gruaja dhe fëmijët në organizatë…
Rosalinda ishte, deri në vitin 2018, gruaja e El Menchos. Ata kanë tre fëmijë: Jessica, Laisa dhe Ruben, me nofkën El Mencito.
Ruben: i konsideruar si i dyti në komandë të CJNG-së para arrestimit të tij në 2014. Ai u ekstradua në SHBA në 2020 dhe u dënua për vrasje, trafik droge dhe posedim armësh në 2024.
Jessica: Në shkurt të vitit 2020, vajza 33-vjeçare e El Mencho-s, Jessica, e njohur si “La Negra”, u arrestua në Uashington kur shkoi të takonte vëllain e saj Ruben, i cili u ekstradua në SHBA për trafik droge.Ai u akuzua për përfshirje në transaksione ose marrëveshje pasurie të paluajtshme me biznese të vendosura në listën e zezë nga Departamenti i Thesarit dhe për ofrimin e mbështetjes financiare për CJNG-në. Ajo u deklarua fajtore më 12 mars 2021 dhe u dënua me 2.5 vjet burg më 11 qershor. Në prill 2022, Jessica u lirua.
Rosalinda: Në maj të vitit 2018, gruaja e El Mencho-s, Rosalinda, u arrestua me akuzën e pastrimit të parave. Rosalinda u lirua më vonë pasi iu dha një garanci prej 1.5 milion dollarësh meksikanë (78,000 dollarë amerikanë) në shtator 2018, por ajo ende përballet me akuza penale dhe do të dalë në gjyq. Në nëntor 2021, Rosalinda, e njohur si “La Jefa”, u arrestua në Zapopan, Jalisco. Në kohën e arrestimit të saj, gruaja e El Mencho u identifikua si drejtoresha financiare e CJNG.
Familja e tij kishte rol të drejtpërdrejtë në menaxhimin dhe financimin e operacioneve të kartelit.
El Mencho ishte shembulli i një krimineli që shndërroi një kartel droge në një aparat shtetëror paralel, duke kontrolluar territore, taksa dhe operacione publike. Vrasja e tij shënoi një pikë kritike në luftën kundër drogës në Meksikë dhe mund të ndikojë marrëdhëniet me SHBA-në, duke treguar efektivitetin e operacioneve të inteligjencës dhe forcave të armatosura meksikane.
Megjithatë, pas vdekjes së tij, dhuna dhe trazirat brenda CJNG-së tregojnë se sfida për stabilitetin dhe luftën kundër karteleve është ende larg./fjala.al-A.D