Vdekja e Jorge Messit në moshën 68-vjeçare rikthen në vëmendje një histori që shkon shumë përtej marrëdhënies baba-bir.
Përpara se Lionel Messi të bëhej një nga futbollistët më të mëdhenj të të gjitha kohërave, ishte Jorge ai që mori vendimet e vështira, negocioi marrëveshjet vendimtare dhe refuzoi të dorëzohej kur karriera e djalit të tij ishte ende një bast i madh.
Nga trajtimi me hormonin e rritjes te kontrata e famshme e shkruar në një pecetë dhe presioni për një kalim të mundshëm te Real Madridi, Jorge ishte figura që qëndroi pas çdo hapi të rëndësishëm të Lionelit.
Jorge Messi nuk ishte thjesht babai i Lionel Messit. Për pjesën më të madhe të karrierës së djalit të tij, ai ishte këshilltari, negociatori, përfaqësuesi dhe personi që qëndronte në prapaskenë kur duhej marrë një vendim i rëndësishëm.
Leo kishte talentin. Jorge ishte ai që duhej të gjente mënyrën për ta çuar atë talent deri në skenën më të madhe. Dhe gjithçka nisi në Rosario.
Lionel Messi nisi të luante futboll në moshë shumë të vogël dhe u bashkua me Newell’s Old Boys kur ishte vetëm gjashtë vjeç.
Talentet e tij ishin të dukshme që në fillim. Por, paralelisht me zhvillimin e tij si futbollist, familja u përball me një problem serioz: Leo vuante nga mungesa e hormonit të rritjes dhe trajtimi i tij ishte i kushtueshëm. Newell’s nuk mund ta përballonte më trajtimin.
Jorge e kuptoi se, nëse donte që djali i tij të vazhdonte të ndiqte ëndrrën, duhej të gjente një zgjidhje tjetër.
Kështu filloi kërkimi për një klub që jo vetëm do ta besonte talentin e Leos, por do të ishte i gatshëm të investonte edhe te shëndeti dhe zhvillimi i tij. River Plate e refuzoi mundësinë.
Më pas në horizont u shfaqën edhe klube të tjera të mëdha spanjolle, përfshirë Real Madridin dhe Atlético Madridin.
Por Jorge kishte një tjetër objektiv. Barcelona.
Në vitin 2000, Jorge mori djalin e tij adoleshent dhe udhëtoi drejt Spanjës. Leo ishte vetëm 13 vjeç.
Ishte një bast i madh për familjen. Një fëmijë nga Rosario po largohej nga vendi i tij për të provuar në një nga akademitë më të famshme të futbollit në botë. Barcelona e pa menjëherë talentin.
Carles Rexach, një nga drejtuesit e rëndësishëm të klubit në atë periudhë, mbeti i impresionuar.
Por problemi ishte se Barcelona po kalonte një periudhë të vështirë financiare dhe jo të gjithë në klub ishin të bindur se duhej të ndërmerrnin një investim të tillë për një djalë kaq të ri. Jorge nuk donte të priste pafundësisht.
Dhe pikërisht atëherë ndodhi një nga episodet më të famshme në historinë e futbollit.
Në dhjetor të vitit 2000, në një klub tenisi në Barcelonë, u zhvillua një takim që do të ndryshonte përgjithmonë historinë e futbollit.
Jorge ishte i shqetësuar se Barcelona po hezitonte. Nëse klubi nuk merrte një vendim, familja mund të largohej.
Carles Rexach, përballë kësaj situate, mori një pecetë dhe shkroi aty premtimin për të nënshkruar me Lionel Messin.
Dokumenti ishte jashtëzakonisht i pazakontë, por marrëveshja u formalizua më pas dhe u bë pika e nisjes së një prej historive më të mëdha sportive.
Peceta që vulosi fatin e Messit u kthye më vonë në një objekt historik dhe u shit në ankand për rreth 762 mijë paund.
Por pas kësaj historie fshihet një detaj i rëndësishëm: Jorge nuk lejoi që Barcelona ta mbante djalin e tij në pritje pa një garanci konkrete. Ai kërkoi një përgjigje dhe e mori.
Vendimi tjetër ishte edhe më i vështirë. Leo duhej të qëndronte në Barcelonë.
Nëna e tij, Celia, dhe pjesa tjetër e familjes u kthyen në Rosario, ndërsa Jorge qëndroi në Spanjë me djalin. Messi ishte ende fëmijë. Ishte larg shtëpisë, miqve dhe familjes.
Vetë Leo ka treguar se ajo periudhë ishte shumë e vështirë emocionalisht dhe se ai dhe babai i tij shpesh përpiqeshin të mos tregonin se sa shumë po vuanin.
Por Jorge bëri zgjedhjen e tij: nëse Leo donte të qëndronte, ai do të qëndronte me të. Ky ishte ndoshta vendimi më i rëndësishëm i jetës së tij.
Leo filloi të ngjitej me shpejtësi në sistemin e të rinjve të Barcelonës. Talentit të tij nuk i duhej shumë kohë për të dalë në pah. Por në atë moment Jorge ndryshoi edhe rolin e tij.
Nuk ishte më vetëm babai që e kishte sjellë djalin në Barcelonë. Ai u bë edhe negociatori i karrierës së tij.
Në vitin 2004 u nënshkrua kontrata e parë profesionale e Lionel Messit me Barcelonën dhe që nga ajo pikë, Jorge do të ishte një figurë e vazhdueshme në negociatat për të ardhmen e të birit.
Ndërsa Messi po shndërrohej në yllin e ri të futbollit botëror, interesi për të nuk mungonte.
Në një moment të rëndësishëm të karrierës së tij, edhe Real Madridi u shfaq si një alternativë reale.
Presioni nga klubet rivale u bë një element i rëndësishëm në negociatat për kontratat e Messit. Por Jorge nuk kishte ndërmend të lejonte që djali i tij të trajtohej si një lojtar i zakonshëm. Nëse Barcelona donte ta mbante, duhej të tregonte se sa shumë e vlerësonte.
Kjo ishte një nga mënyrat se si Jorge e menaxhoi karrierën e të birit: ai përdori interesin e klubeve të tjera për të mbrojtur pozicionin e Leos dhe për të siguruar marrëveshje më të mira./ad