Reshje intensive shiu kanë shkaktuar rrëshqitje masive dheu dhe përmbytje të befasishme në rajonin e Arequipa Region në Peru, duke lënë pas dëme të mëdha materiale dhe dhjetëra familje pa strehë.
Pamjet e publikuara tregojnë rrjedha të fuqishme balte dhe mbeturinash që përshkojnë rrugët e zonave të banuara, ndërsa uji ka depërtuar në banesa, duke arritur deri në nivelin e gjunjëve. Banorët shihen teksa përpiqen të shpëtojnë sendet personale mes kushteve të vështira dhe rrezikut të vazhdueshëm.
Autoritetet lokale bëjnë me dije se disa banesa janë shpallur të pabanueshme për shkak të dëmtimeve serioze strukturore. Guvernatori rajonal, Rohel Sanchez, ka kërkuar ndërhyrjen e menjëhershme të qeverisë qendrore për sigurimin e mjeteve të rënda, me qëllim pastrimin e zonave të prekura dhe hapjen e rrugëve të bllokuara. Ai gjithashtu ka bërë thirrje për realizimin e një regjistrimi të detajuar të familjeve të prekura, për të mundësuar ndihmë emergjente.
Përmbytjet e së dielës vijnë vetëm pak ditë pas një stuhie tjetër vdekjeprurëse që goditi të njëjtin rajon të enjten, ku humbën jetën dy persona.
Autoritetet vijojnë operacionet e kërkim-shpëtimit dhe u bëjnë thirrje banorëve të qëndrojnë vigjilentë, ndërsa kushtet atmosferike mbeten të paqëndrueshme në jug të vendit./MXH