Një tjetër qytet italian i është bashkuar nismës së shtëpive simbolike për vetëm 1 euro. Naro, një qytezë mesjetare në Sicili, po ofron prona me këtë çmim minimal në përpjekje për të rigjallëruar qendrën historike, restauruar ndërtesat e braktisura dhe luftuar shpopullimin.
Qyteti, që ndodhet në provincën e Agrigentos, synon gjithashtu të nxisë turizmin dhe të tërheqë banorë të rinj. Nisma është miratuar nga autoritetet lokale dhe është e hapur si për shtetasit italianë, ashtu edhe për blerësit e huaj, me kusht që të përmbushin kriteret e përcaktuara për blerjen dhe mirëmbajtjen e pronës.
Aplikimet mund të bëhen përmes platformës online “Case 1 Euro Naro”, ku të interesuarit mund të shohin pronat dhe procedurat për blerjen e tyre.
Megjithatë, çmimi prej vetëm 1 euroje nuk është i vetmi shpenzim që duhet të marrin parasysh blerësit. Të gjitha pronat e listuara kanë nevojë për rikonstruksion dhe kostot e restaurimit mbeten përgjegjësi e blerësit.
Përveç çmimit simbolik, pronari i ri duhet të mbulojë shpenzimet noteriale, taksat e regjistrimit dhe ato kadastrale, si edhe kostot për projektimin, restaurimin dhe përshtatjen e ndërtesës me standardet e sigurisë dhe rregullat urbanistike. Në disa raste, ekziston edhe një afat i përcaktuar për përfundimin e punimeve.
Por për ata që kërkojnë të jetojnë larg destinacioneve turistike më të zakonshme të Italisë, Naro ofron një kombinim të historisë dhe arkitekturës siciliane. Qyteti ruan ndërtesa mesjetare dhe baroke, Kështjellën Chiaramontano dhe peizazhet karakteristike të brendësisë së provincës së Agrigentos.
Pas një rrëshqitjeje të madhe dheu në vitin 2005, artistë të rinj transformuan fasadat e disa ndërtesave të dëmtuara, duke krijuar muzeun në ajër të hapur MAN.
Ndër atraksionet e qytetit është edhe Porta d’Oro, ose “Porta e Artë”, një strukturë historike që daton që nga shekulli XIII dhe dikur ishte pjesë e sistemit prej shtatë hyrjesh që rrethonin qytetin gjatë Mesjetës.
Naro është gjithashtu një destinacion për dashamirësit e kuzhinës siciliane, me ëmbëlsira tradicionale si cassata dhe pasta reale, si edhe specialitete lokale që i japin qytezës një tjetër arsye për t’u vizituar.
Kështu, për vetëm 1 euro mund të blihet një pronë në Sicili, por rikthimi i saj në jetë kërkon një investim shumë më të madh.