Në një intervistë të fundit me Meriton Mjekiqi, këngëtarja Tayna ka ndarë me publikun detaje rreth albumit të saj më të ri “Genesis”, i cili është punuar gjatë një periudhe disa mujore dhe përfshin një përzgjedhje të kujdesshme bashkëpunimesh.
Ajo tregoi se gjatë procesit të krijimit të albumit është punuar në mënyrë shumë të organizuar, duke u fokusuar që çdo këngë dhe çdo bashkëpunim të përputhet me konceptin e përgjithshëm të projektit. Sipas saj, qëllimi ka qenë ruajtja e një linje të qartë artistike dhe mos devijimi nga ideja kryesore e albumit.
Në këtë kontekst, u përmend edhe një nga bashkëpunimet më të përfolura që publiku kishte pritur, ai me Yll Limanin. Tayna konfirmoi se ka pasur plane për një duet mes tyre, por ky projekt nuk është finalizuar për albumin “Genesis” për shkak të ndryshimeve që kanë ndodhur në momentet e fundit të punës.
“Kemi pasur ide për ta realizuar me Yllin, por në fund nuk u bë e mundur,” u shpreh ajo shkurtimisht, duke lënë të kuptohet se rrethanat nuk përputheshin me kohën e projektit.
Më tej, ajo komentoi edhe zhvillimet në skenën muzikore, duke theksuar se shumë artistë sot po eksperimentojnë me zhanre të ndryshme. Megjithatë, Tayna u shpreh se jo çdo bashkëpunim apo stil i ri i përshtatet natyrshëm një projekti të caktuar.
Sipas saj, në “Genesis” çdo zgjedhje është bërë me qëllim që të ruhet koherenca e albumit, edhe nëse kjo nënkupton lënien jashtë të disa ideve apo bashkëpunimeve potenciale./mxh