Mbreti Charles III bëri thirrje për “vendosmëri të palëkundur” në mbrojtje të Ukrainës dhe iu referua Magna Carta-s, dokumentit historik që shpalli se edhe mbretërit duhet t’i nënshtrohen ligjit.
Mbreti Charles III të martën u paraqit para një sesioni të përbashkët të Kongresit amerikan dhe mbajti një nga deklaratat më të drejtpërdrejta që një lider aleat ka bërë ndonjëherë në tokën amerikane gjatë mandatit të dytë të Presidentit Donald Trump.
Charles përmendi përgjigjen e NATO-s sipas Nenit 5 ndaj sulmeve terroriste të 11 shtatorit 2001, një qortim i drejtpërdrejtë ndaj kritikave të rregullta të Trump ndaj aleatëve të NATO-s, duke i quajtur ata të paaftë për Shtetet e Bashkuara. Ai bëri thirrje për “vendosmëri të palëkundur” në mbrojtje të Ukrainës dhe përmendi krijimin e Magna Carta në vitin 1215, e cila deklaroi se edhe një mbret nuk është mbi ligjin.
“Menjëherë pas 11 shtatorit, kur NATO-ja e thirri Nenin 5 për herë të parë… ne iu përgjigjëm thirrjes së bashku, siç e ka bërë populli ynë për më shumë se një shekull, krah për krah”, tha mbreti.
Charles foli gjatë një vizite shtetërore të organizuar me shumë pompozitet nga Trump, me nderime ushtarake, fluturim avionësh luftarakë, dhurata zyrtare dhe një darkë gala me veshje formale.
Më pas, mbreti dhe mbretëresha pritet të vizitojnë Nju Jorkun për ceremoninë e vendosjes së kurorës në memorialin e 11 shtatorit.
Përtej kritikave të nënkuptuara, Charles vlerësoi marrëdhënien mes dy vendeve dhe dënoi sulmin ndaj një eventi për gazetarë, duke thënë se “akte të tilla dhune nuk do të kenë kurrë sukses”.
Nga ana e tij, Trump e quajti Mbretërinë e Bashkuar “aleatin më të ngushtë” të SHBA-së dhe vlerësoi bashkëpunimin ushtarak mes dy vendeve. Në rrjetet sociale të Shtëpisë së Bardhë u publikua një foto ku Trump dhe mbreti shfaqen duke qeshur me mbishkrimin “DY MBRETËR”, në përgjigje të kritikëve që e quajnë Trump si figurë me prirje monarkike.
Më herët, Trump tha se ishte “një nder i madh” të takonte mbretin, duke e quajtur atë “fantastik”.
Në fjalimin e tij, Charles gjithashtu theksoi rëndësinë e klimës dhe paralajmëroi për rreziqet që sjell ndryshimi klimatik, duke thënë se bota duhet të përballet me “kolapsin e sistemeve natyrore kritike”./fjala.al