Shqipëria ka rreth 4 mijë individë që punojnë në fushën e kërkimit shkencor, duke kontribuar në konceptimin dhe krijimin e dijeve, produkteve, proceseve dhe sistemeve të reja. Të dhënat janë bërë publike për herë të parë nga Instituti i Statistikave (INSTAT).
Një nga ndryshimet më të dukshme është se tani kërkimi shkencor është gjithnjë e më shumë në duar të femrave. Sipas statistikave, 54,4% e personave që angazhohen në kërkim dhe zhvillim janë femra, një rritje e konsiderueshme krahasuar me vitet e kaluara, kur ky sektor dominonte nga meshkujt.
Në total, 3.748 persona janë të angazhuar në aktivitetin e kërkimit dhe zhvillimit në Shqipëri, me 81,6% të tyre që punojnë në institucione të arsimit të lartë, ndërkohë që ndërmarrjet private dhe OJF-të përbëjnë 9,6% dhe sektori shtetëror 8,8%.
Pjesa më e madhe e personelit që punon në këtë sektor janë kërkues shkencorë, të cilët zënë 55,2% të totalit të angazhuarve. Pas tyre, vijnë profesionistët me 21,6%, personeli teknik me 10,6%, dhe personeli mbështetës me 12,6%.
Një tjetër tendencë pozitive është rritja e numrit të personelit me nivel arsimor të lartë. Pjesa më e madhe e personelit të angazhuar në kërkim dhe zhvillim në sektorin e institucioneve të arsimit të lartë ka titullin “Doktorant”, duke përbërë 51,2% të totalit, një rritje prej 5,2% krahasuar me vitin 2021./ S,M
