Kryesocialisti Edi Rama zhvilloi një takim me gratë dhe vajzat e qarkut të Shkodrës, në kuadër të zgjedhjeve parlamentare të 11 majit dhe turit elektoral.
I shoqëruar nga kandidatët për deputetë dhe strukturat drejtuese të partisë në qark, si dhe kryebashkiaku Benet Beci si kreu politik i qarkut, kreu i mazhorancës u prit nga qindra gra dhe vajza, teksa para nisjes theksonte rëndësinë e tyre në integrimin e vendit drejt Bashkimit Europian dhe se sa e rëndësishme është kjo votë më 11 maj.
“Mes interesit të një populli të tërë dhe hallit të një njeriu të vetëm; mes të mirës së një vendi të tërë dhe interesit të një familjeje të vetme; mes Shqipërisë me BE-në zonjë në Europë dhe Shqipërisë me Bufin e Kënetës prapë në gropë… Kush zgjedh të parën Shqipërinë, voton 5!”, shprehet Rama në rrjetin social, pak para fjalës së tij.
Takimi u hap me këngë e valle nga zona e Shkodrës.
Fjalën e parë dhe moderimin e mbajti kryebashkiaku Benet Beci, që prezantoi edhe kandidatët e qarkut për PS-së, si drejtues politik.
“Kryeministri ka kthyer sytë nga Shkodra dhe do e bëjmë Shkodrën zonjën e Shqipërisë në Europë. Gratë dhe vajzat janë një forcë e madhe dhe e rëndësishme për Shkodrën, Shqipërinë dhe PS-në”, tha Beci mes të tjerash në fjalën e tij. m.p.
