Erion Veliaj do të vijojë të qëndrojë në paraburgim, pas vendimit të sotëm të Gjykatës së Lartë.
Ky vendim shuan përfundimisht shpresat e tij për t’u rikthyer në drejtimin e Bashkisë së Tiranës, duke krijuar mundësinë për zgjedhje të parakohshme në kryeqytet.
Bashkia e Tiranës drejtohet aktualisht nga kryetarja e deleguar, Anuela Ristani, megjithatë burgosja e Veliajt ka shkaktuar një ngërç që prej 10 shkurtit të këtij viti, i cili do të duhet të zgjidhet.
Sinjalet e para për një zgjidhje për vakumin e krijuar në drejtimin e Tiranës, nga burgosja e kryebashkiakut, erdhën nga kryeministri Edi Rama, i cili, disa ditë para vendimit të Gjykatës së Lartë, u kërkoi deputetëve të Tiranës angazhim më të madh në terren dhe kontakt të drejtpërdrejtë me problematikat e komunitetit. Në të njëjtën kohë, në media u raportua se Rama kishte deklaruar privatisht: “Nuk i dihet si do të shkojë kjo punë”.
Ndërkohë, gjatë vjeshtës do të zhvillohen zgjedhje të pjesshme në bashkitë e Tepelenës, Matit dhe Beratit, për shkak të dorëheqjes së kryetarëve për të hyrë në Kuvend. Vendimi i sotëm i Gjykatës së Lartë pritet t’i shtojë këtyre edhe Tiranën, duke e përfshirë kryeqytetin në proces zgjedhor. m.p.
