Last Updated on 24/03/2026 by Anisa
Sipas “Financial Times”, investitorët vendosën më shumë se gjysmë miliardë dollarë në kontrata të së ardhmes për naftën, vetëm 15 minuta para se presidenti Trump të njoftonte dje se SHBA kishte zhvilluar dy ditë “bisedime shumë të mira dhe produktive” me Iranin.
Kontratat e së ardhmes për naftën janë marrëveshje për blerje dhe shitje të naftës me një çmim të caktuar paraprakisht. Ato përdoren si mjet për të mbrojtur veten nga luhatjet e çmimeve, pasi sigurojnë një nivel të caktuar çmimi të naftës, por njëkohësisht janë gjithashtu objekt tregtimi në bursë.
Analiza e të dhënave të Bloomberg tregon se 6,200 kontrata për naftën Brent dhe West Texas Intermediate u tregtuan midis orës 6:49 dhe 6:50 të mëngjesit, sipas orës së Nju Jorkut – vetëm 15 minuta para njoftimit të Trump, raporton FT.
Investitorët ndoshta fituan një pasuri të madhe, megjithëse shuma e saktë nuk dihet.
Postimi i Trump në platformën Truth Social – i publikuar të hënën në mëngjes sipas orës lokale dhe i mohuar menjëherë nga Teherani – shkaktoi rënien e çmimit të naftës, duke nxitur një shitje globale të naftës.
Financial Times theksojnë se volumi i lartë i tregtimit kaq pranë njoftimit të Trump ka befasuar botën financiare. Kjo vjen gjithashtu pas një serie investimesh spekulative të profilit të lartë në platforma si Polymarket, të cilat janë shumë të sinkronizuara me vendime të rëndësishme të Shtëpisë së Bardhë – duke ngritur pyetje mbi shfrytëzimin e informacionit konfidencial.
“Intuita ime, nga ndjekja e tregjeve gjatë 25 viteve të fundit, është se kjo është vërtet e pazakontë,” tha një menaxher portofoli për gazetën britanike.
“Është një transaksion jashtëzakonisht i madh për një ditë pa ngjarje të rrezikshme… Dikush sapo u bë shumë më i pasur,” shtoi menaxheri./A.D