Qeveria e Izraelit ka paralajmëruar ngritjen e një padie ligjore ndaj gazetës amerikane The New York Times, lidhur me një shkrim të publikuar nga gazetari Nick Kristof, e cila trajtonte pretendimet për abuzime seksuale ndaj të burgosurve palestinezë në burgjet izraelite.
Sipas deklaratës të zëdhënësit të Ministrisë së Jashtme të Izraelit, Oren Marmorstein, përmbajtja e shkrimit është konsideruar nga autoritetet izraelite si e pavërtetuar dhe potencialisht shpifëse, duke dëmtuar imazhin e shtetit izraelit dhe institucioneve të tij të sigurisë. Shteti i Izraelit ka theksuar se qeveria po vlerëson hapat ligjorë që mund të ndërmerren kundër medias amerikane, në lidhje me këtë publikim.
Çështja lidhet me një opinion, ku Kristof ka ngritur shqetësime mbi raportime dhe akuza që pretendojnë keqtrajtim të të ndaluarve palestinezë në disa objekte ndalimi në Izrael. Këto pretendime kanë shkaktuar reagime të forta diplomatike dhe politike, duke rihapur debatin ndërkombëtar mbi trajtimin e të burgosurve në luftën izraelito-palestineze.
Nga ana e saj, pala izraelite ka kundërshtuar kategorikisht akuzat, duke i cilësuar si të pabazuara dhe duke theksuar se sistemet e saj ligjore dhe ushtarake veprojnë sipas standardeve ndërkombëtare.
Debati vjen në një moment të tensionuar diplomatik dhe mediatik, ku raportimet mbi konfliktin dhe trajtimin e të ndaluarve kanë marrë vëmendje të madhe ndërkombëtare.
Deri tani, nuk ka konfirmim zyrtar për ngritjen e një padie të depozituar në gjykatë, por vetëm paralajmërime dhe deklarata publike nga autoritetet izraelite./mxh