Last Updated on 29/06/2026 by EL
Hong Myung-bo ka dhënë dorëheqjen nga posti i trajnerit të kombëtares së Koresë së Jugut, pasi ekipi nuk arriti të kualifikohej në fazën me eliminim direkt të Botërorit.
Shpresat e ekipit për të kaluar më tej si një nga skuadrat më të mira të renditura në vendin e tretë u shuan të shtunën, pas përfundimit të ndeshjeve të tjera të fazës së grupeve.
Eliminimi i hershëm ka shkaktuar reagime të forta në Korenë e Jugut, ndërsa presidenti Lee Jae Myung ka kërkuar nisjen e një hetimi për të zbardhur arsyet e paraqitjes zhgënjyese të ekipit.
Hong u kërkoi falje tifozëve të dielën, duke marrë të gjithë përgjegjësinë për dështimin.
“Përgjegjësia bie tërësisht mbi mua si trajner i ekipit kombëtar”, deklaroi ai.
Koreja e Jugut, e renditur në vendin e 32-të në renditjen e FIFA-s dhe e udhëhequr nga ylli Son Heung-min, e mbylli fazën e grupeve me një fitore dhe dy humbje, duke përfunduar pas Meksikës dhe Afrikës së Jugut, të renditura përkatësisht në vendin e 15-të dhe të 60-të në botë.
Kritikat u shtuan menjëherë pas humbjes 1-0 ndaj Afrikës së Jugut të enjten, rezultat që e la Korenë e Jugut në vendin e tretë të Grupit A.
Megjithatë, falë formatit të ri të Kupës së Botës, e zgjeruar nga 32 në 48 skuadra, ekzistonte ende mundësia që ekipi të kualifikohej si një nga tetë skuadrat më të mira të renditura në vendin e tretë. Kjo shpresë u shua të shtunën, pasi rezultatet e ndeshjeve të tjera nuk e favorizuan Korenë e Jugut.
Tifozët kanë drejtuar kritikat kryesisht ndaj Hong, i cili drejtoi ekipin për dy vitet e fundit. Të hënën, grupi zyrtar i tifozëve Red Devils publikoi një deklaratë, ku i kërkoi trajnerit të “gjunjëzohet para gjithë kombit dhe të largohet përgjithmonë nga futbolli”.
Duke njoftuar dorëheqjen në një konferencë për shtyp në Meksikë, Hong pranoi se ekipi nuk arriti të përmbushte pritshmëritë e tifozëve.
“Edhe pse po largohem nga kombëtarja, nuk po i kthej shpinën futbollit korean. Do ta mbështes ekipin me gjithë zemër dhe shpresoj që ai të fitojë sërish besimin dhe dashurinë e popullit”, tha ai.
Dorëheqja erdhi pak pasi presidenti Lee deklaroi se rezultati i papritur i kishte shkaktuar “jo vetëm konfuzion, por edhe habi të plotë”.
Në një postim në rrjetin social X, ai tha se eliminimi i hershëm “duket të jetë pasojë e dështimeve në organizim dhe menaxhim të personelit”.
“Kur favorizimi dhe nepotizmi vendosen mbi meritën në zgjedhjen e drejtuesit, rezultati është po aq i parashikueshëm sa letra që digjet nga zjarri”, shkroi presidenti.
Emërimi i Hong Myung-bo si trajner kishte qenë i debatueshëm që në fillim. Ish-mbrojtësi konsiderohet hero kombëtar për rolin e tij si kapiten i Koresë së Jugut në Kupën e Botës 2002, ku ekipi arriti historikisht në gjysmëfinale.
Megjithatë, kur ai drejtoi kombëtaren si trajner në Botërorin e vitit 2014, skuadra nuk arriti të kalonte fazën e grupeve dhe nuk fitoi asnjë ndeshje.
Kur Hong u emërua sërish në këtë detyrë në vitin 2024, vendimi u prit me kritika të shumta. Shumë tifozë akuzuan Federatën Koreane të Futbollit se favorizoi një figurë të afërt me drejtuesit e saj, duke lënë mënjanë disa kandidatë të huaj që kishin kaluar një proces të rreptë përzgjedhjeje.
Vetë Hong deklaroi të dielën se pranimi i detyrës “nuk ishte një vendim i lehtë”.
“Nuk mund të them se çdo vendim që kam marrë ka qenë i duhuri, por mund të siguroj se çdo vendim është marrë duke pasur në mendje interesin e futbollit korean”, u shpreh ai.
Policia koreano-jugore ka shtuar masat e sigurisë në aeroportin Incheon dhe në disa zona të tjera, pasi në internet u publikua një kërcënim me vdekje ndaj Hong Myung-bo përpara rikthimit të tij në Korenë e Jugut, raporton BBC./et