Last Updated on 07/08/2026 by EL
Një studim i gjerë gjenetik, i publikuar në revistën Nature, ka identifikuar një mutacion të rrallë në gjenin FNIP1 që lidhet me një përbërje më të shëndetshme të trupit. Personat që mbartin këtë variant kanë më shumë masë muskulore, më pak yndyrë në zonën e barkut, nivele më të ulëta të sheqerit në gjak dhe një rrezik dukshëm më të vogël për të zhvilluar diabet të tipit 2 apo sëmundje kardiovaskulare.
Studiuesit analizuan më shumë se një milion genome nga popullata të tre kontinenteve. Vetëm rreth një person në 7.000 rezultoi të kishte variantin e rrallë që çaktivizon një kopje të gjenit FNIP1, por tek këta individë rreziku për sëmundje kardiometabolike ishte rreth 60% më i ulët krahasuar me popullatën e përgjithshme.
Gjeni FNIP1 luan një rol të rëndësishëm në rregullimin e metabolizmit dhe mënyrën se si qelizat reagojnë ndaj lëndëve ushqyese. Eksperimentet në qeliza njerëzore dhe te minjtë treguan se çaktivizimi i këtij gjeni nxit djegien e yndyrave, ul grumbullimin e tyre dhe përmirëson ndjeshmërinë metabolike.
Sipas autorëve të studimit, gjatë evolucionit ky mekanizëm ndihmonte njerëzit të ruanin energjinë në periudha urie. Megjithatë, në kushtet e sotme, ku ushqimi është i bollshëm, ai mund të favorizojë grumbullimin e yndyrës. Varianti i rrallë i FNIP1 duket se e zbut këtë “frenë metabolike”, duke rritur shpenzimin e energjisë.
Megjithatë, studiuesit nuk vunë re ndryshime të rëndësishme në peshën totale trupore të personave me këtë mutacion, duke sugjeruar se ata mund ta kompensojnë djegien më të madhe të energjisë duke konsumuar më shumë kalori.
Shkencëtarët besojnë se FNIP1 mund të shndërrohet në një objektiv premtues për zhvillimin e barnave të reja kundër diabetit dhe sëmundjeve kardiometabolike. Megjithatë, ata paralajmërojnë se çdo terapi e ardhshme duhet të zhvillohet me kujdes, pasi çaktivizimi i plotë i gjenit lidhet me probleme serioze të zemrës dhe çrregullime të sistemit imunitar./et