Last Updated on 19/10/2026 by EL
Kenia ka konfirmuar rastin e tetë me Ebola, ndërsa epidemia në Republikën Demokratike të Kongos po përhapet në zona të reja. Autoritetet shëndetësore po shtojnë masat e mbikëqyrjes dhe ndërgjegjësimit, ndërsa vendet fqinje kanë forcuar kontrollet kufitare.
Autoritetet keniane kanë zbuluar rastin e tetë me Ebola, pasi një person tjetër rezultoi pozitiv gjatë periudhës së karantinës, bëri të ditur të dielën një zyrtar i Ministrisë së Shëndetësisë.
I infektuari është një 49-vjeçar, i cili ishte kujdesur për pacientin e parë të diagnostikuar me virusin. Ai shfaqi simptoma si temperaturë e lartë, dhimbje koke dhe dhimbje muskulore. Për shkak të ekspozimit të mundshëm ndaj virusit, ai ishte vendosur në karantinë.
“Sot testuam 38 persona dhe njëri rezultoi pozitiv”, deklaroi Patrick Amoth, drejtues i Ministrisë së Shëndetësisë, duke shtuar se burri ndodhej në karantinë që prej 9 tetorit.
Kenia raportoi vdekjen e parë nga Ebola në historinë e saj më 5 tetor, kur një burrë, i cili kishte jetuar në Republikën Demokratike të Kongos, ndërroi jetë pasi u kthye në vendin e tij.
Shtatë rastet e tjera janë familjarë të pacientit të parë ose punonjës shëndetësorë që u kujdesën për të. Sipas Amoth, gjendja e tyre është e qëndrueshme.
Ministria e Shëndetësisë bëri të ditur se 128 persona që kanë pasur kontakte me pacientin e parë vijojnë të qëndrojnë në karantinë.
Pavarësisht rasteve të konfirmuara, Kenia nuk ka vendosur kufizime për udhëtimet, tregtinë apo grumbullimet publike, në përputhje me rekomandimet e Organizatës Botërore të Shëndetësisë. Megjithatë, autoritetet po intensifikojnë monitorimin epidemiologjik dhe fushatat e informimit të komuniteteve.
Ndërkohë, Tanzania fqinje ka forcuar kontrollet shëndetësore në kufi, duke vendosur deklarata të detyrueshme shëndetësore dhe monitorim për 21 ditë për udhëtarët që mbërrijnë nga vendet me rrezik të lartë.
Epidemia në Kongo prek një tjetër provincë
Ndërsa situata në Kenia po monitorohet nga afër, epidemia vazhdon të përhapet edhe në Republikën Demokratike të Kongos, ku janë raportuar raste në një provincë të tetë.
Gjatë fundjavës janë konfirmuar dy raste të reja, njëri prej të cilëve me pasojë vdekjen, në provincën Nord-Ubangi, ku më parë nuk ishin raportuar raste. Kjo zonë kufizohet me Republikën e Afrikës Qendrore.
Nord-Ubangi ndodhet mes provincave Sud-Ubangi dhe Bas-Uele, dy zona të tjera ku virusi është përhapur së fundmi. Në këto territore, dhuna e përsëritur e grupeve të armatosura ka detyruar mijëra njerëz të largohen nga banesat dhe të kërkojnë strehim në komunitete të tjera brenda Kongos.
Autoritetet kanë raportuar deri më tani 9.455 raste dhe 4.561 viktima, në atë që përshkruhet si epidemia e Ebolës me përhapjen më të shpejtë në histori.
“Po shohim që vatrat e Ebolës në përgjithësi po zvogëlohen, por, për fat të keq, virusi po përhapet gjeografikisht në zona të reja”, deklaroi Mohamed Yakub Janabi, drejtor rajonal i Organizatës Botërore të Shëndetësisë për Afrikën, për agjencinë Associated Press.
Sipas Janabit, një nga sfidat më të mëdha mbetet bindja e personave të infektuar që të kërkojnë ndihmë mjekësore. Ai paralajmëroi se disa pacientë po humbin jetën në komunitete, jashtë qendrave shëndetësore.
Epidemia shkaktohet nga virusi Bundibugyo, një nga llojet e virusit Ebola, për të cilin nuk ka vaksina të licencuara apo trajtime specifike të miratuara. Megjithatë, në Republikën Demokratike të Kongos po zhvillohen prova për trajtime dhe vaksina të mundshme.