Aktorja e njohur britanike Joanna Lumley feston 80-vjetorin e lindjes këtë të premte (1 maj), duke shënuar një karrierë të gjatë dhe të suksesshme në teatër, televizion dhe film.
E lindur në vitin 1946 në Srinagar, atëherë pjesë e Indisë nën administrimin britanik, Lumley u bë e famshme për rolin e saj si Patsy Stone në serialin komedik Absolutely Fabulous, një nga prodhimet më të suksesshme të BBC.
Ajo e nisi karrierën si modele mode, përpara se të kalonte në aktrim në fund të viteve 1960. Fama ndërkombëtare erdhi me rolin e Purdey në serialin The New Avengers, ndërsa më pas u vlerësua për interpretimet në produksione si Sapphire & Steel dhe Sensitive Skin.
Në kinematografi, Lumley ka marrë pjesë në filma të njohur si The Wolf of Wall Street, ndërsa së fundmi është shfaqur në rolin e Hester Frump në sezonin e dytë të serialit Wednesday në platformën Netflix.
Përveç aktrimit, ajo është bërë e njohur edhe për dokumentarët e udhëtimeve, si Joanna Lumley’s Japan dhe Joanna Lumley’s Silk Road Adventure, ku eksploron kultura dhe vende të ndryshme të botës.
Jashtë ekranit, Lumley është një aktiviste e zëshme për të drejtat e njeriut dhe mbështetëse e shumë organizatave bamirëse. Ajo luajti një rol kyç në fushatën për të drejtat e Gurkhas në vitin 2009.
Për kontributin e saj në art dhe shoqëri, ajo është nderuar me titullin Oficere e Urdhrit të Perandorisë Britanike (OBE) në vitin 1995 dhe më pas u shpall Dame Komandante (DBE) në vitin 2022. Gjithashtu, ajo është zgjedhur anëtare e Royal Geographical Society dhe ka marrë disa diploma nderi nga universitete prestigjioze.
Në jetën personale, ajo ka një djalë, Jamie, nga lidhja me fotografin Michael Claydon, dhe është e martuar që prej vitit 1986 me dirigjentin Stephen Barlow./mxh
Artikulli i MëparshëmJo vetëm Hormuzi, të gjitha ngushticat që rrezikojnë të bllokojnë ekonominë globale