Premiera e serialit Sky Original “Amadeus”, me Will Sharpe në rolin e Wolfgang Amadeus Mozart dhe Paul Bettany si Antonio Salieri — një adaptim i ri i pjesës teatrale të vitit 1980 të Peter Shaffer (i cili më vonë e përshtati edhe për filmin kult të Milos Forman, fitues i Oscarit në 1985) — do të jetë ngjarja hapëse kinematografike e Noir in Festival 2025.
Edicioni i 35-të i festivalit, i drejtuar nga Giorgio Gosetti dhe Marina Fabbri, do të zhvillohet në Milano nga 1 deri më 6 dhjetor.
“Asnjëherë si këtë vit – thonë dy drejtorët – nuk kemi qenë kaq krenarë të vëmë bast mbi një programim që bën zgjedhje të qarta, vë cilësinë përpara sasisë dhe ofron një vështrim të ndryshëm e befasues mbi zhanrin-simbol të botës në të cilën jetojmë. Hije, intriga, krime dhe mëkate, heronj dhe fajtorë e pushtojnë realitetin tonë dhe imagjinatën tonë: vështrimi i artistëve të mëdhenj dhe i debutuesve të rinj e të pasionuar i bën këto hije më pak të frikshme”.
Çmimi Chandler për karrierën në këtë edicion i jepet shkrimtarit shumë të njohur Mick Herron, i botuar në Itali nga Feltrinelli dhe i famshëm edhe për serialet e Apple TV Slow Horses dhe Down Cemetery Road.
Festivali hapet me një para-ceremoni më 30 nëntor, me shkrimtarin Maurizio de Giovanni, i cili në librin “L’orologiaio di Brest” eksploron marrëdhëniet midis etërve dhe bijve dhe tensionin mes idealizmit dhe cinizmit të pushtetit.
Ndër premierat jashtë konkurrimit për ekranin e madh është thrilleri adrenalitik “Primate”, një “horror natyror” i Johannes Roberts, që ndërthur humor të zi dhe terror animalistik.
Përzgjedhja zyrtare për kinemanë përfshin shtatë filma në konkurrim: nga gangsterja tërësisht femërore e vendosur në provincën e Avinjonit në vitet ’90 në “Le gang des Amazones” të Mélissa Drigeard, te filmi italian “Ferine”, debutimi i Andrea Corsinit në metrazh të gjatë, me aktoren e “body horror” Carolyn Bracken.
Mes eventeve speciale përfshihet një homazh ndaj letërsisë italiane noir të ditëve të sotme (dokumentari i Rai “Chi è senza colpa” i Katiuscia Magliarisi me regji të Riccardo Alessandri); filmi anime “L’uovo dell’angelo”, kryevepër e Mamoru Oshii; si dhe thrilleri/komedia e zezë mbi botën e punës “No Other Choice” nga Park Chan-wook.
Në seksionin letrar marrin pjesë, ndër të tjerë, Giuliano da Empoli (autor i Il mago del Cremlino, kthyer në film nga Olivier Assayas dhe prezantuar në Venecia) i cili sjell në festival librin “L’ora dei predatori”; Marco Vichi me një aventurë të re të komisarit të tij Bordelli, Notti nere; dhe reperi e shkrimtari Daniele Sanzone, i cili në “Bumerang” rrëfen universin e Scampias.
Në fushën e komikseve dhe romaneve grafikë marrin pjesë autorë si Jacopo Starace me Smiling Woods e i diavoli, që evokon atmosfera mes Stephen King dhe David Lynch; Laura Camelli (La Came), që rrëfen se çfarë do të thotë për të arti i komiksit, nga filmi Malanotte – La maledizione della Pantafa deri te kolektivi “Mammaiuto”; si dhe Spugna me Cattivik 2.0, në kuadër të 60-vjetorit të personazhit të krijuar nga Bonvi dhe më pas vizatuar nga Silver.
Dy homazhe të veçanta do t’i kushtohen “martesës” mes noir-it francez dhe atij italian për romanin “Il confine della vergogna” të Michèle Pedinielli dhe Valerio Varesi — një bashkëpunim i lindur nga partneriteti midis Lionit dhe Milanos, qytete të UNESCO-s për letërsinë — si dhe regjisorit Claudio Caligari, të cilin revista “Pantagruel” e Elisabetta Sgarbit e nderon në dhjetëvjetorin e vdekjes.
Si çdo vit, në kuadër të festivalit do të jepet edhe Çmimi Scerbanenco: finalistët e këtij viti janë Davide Longo, Alessandro Robecchi, Barbara Baraldi, Giorgia Lepore dhe Mirko Zilahy.
Përgatiti për botim: L.Veizi