**
Një baterie greke e sistemit të mbrojtjes ajrore Patriot ka interceptuar sulme të nisura nga rebelët Houthi në Jemen kundër Arabisë Saudite, në një periudhë kur tensionet në Lindjen e Mesme po rriten sërish. Sipas burimeve ushtarake greke, një nga sulmet kishte në shënjestër një instalacion të rëndësishëm rafinerie në zonën e Yanbu. Bateria greke Patriot, e dislokuar në Arabinë Saudite në kuadër të misionit “Hellenic Force in Saudi Arabia”, arriti të neutralizonte sulmin e nisur nga territori jemenas. Forcat greke më pas rrëzuan edhe një dron që po afrohej nga Jemeni, duke forcuar mbrojtjen ajrore të zonës. Sistemi Patriot është pjesë e iniciativës “Integrated Air Missile Defense Concept”, e cila synon të mbështesë dhe përmirësojë kapacitetet mbrojtëse të Arabisë Saudite kundër kërcënimeve ajrore.
*Sulme dhe kundërpërgjigje në rajon*
Rebelët Houthi, të mbështetur nga Irani, kanë marrë përgjegjësinë për një sulm me raketë ndaj qytetit jugor saudit Jizan. Autoritetet saudite nuk kanë konfirmuar menjëherë pretendimet e publikuara nga kanalet mediatike të lidhura me Houthët, por autoritetet e mbrojtjes civile lëshuan paralajmërime për banorët e Jizan dhe Yanbu. Sulmet erdhën pas operacioneve të koalicionit të udhëhequr nga Arabia Saudite kundër bazave ushtarake të Houthëve në Jemen. Zëdhënësi i koalicionit, gjenerali Turki al-Maliki, deklaroi se operacioni ishte një kundërpërgjigje ndaj sulmeve të Houthëve kundër anijeve tregtare në Detin e Kuq.
Sipas tij, forcat e koalicionit goditën objektiva ushtarake të Houthëve pasi këta të fundit kishin sulmuar anije tregtare në rajon.
Houthët e cilësuan veprimin saudit si një “përshkallëzim të rrezikshëm”, ndërsa burime të sigurisë në Jemen thanë se ndër objektivat e goditura ishin një bazë detare në portin e Hodeidah dhe një kamp ushtarak në ishullin Kamaran.
Përshkallëzimi i fundit shton një tjetër pikë tensioni në Lindjen e Mesme, në një kohë kur rajoni po përballet me pasoja të konfliktit të gjerë që nisi pas sulmeve amerikano-izraelite ndaj Iranit në shkurt./FC